Yuva Utsav Cum Cultural Day hmang

Nilaini khan Nehru Yuva Kendra (NYK), Champhai leh Govt. Champhai College (GCC) \angdun buatsaihin College Multipurpose Hall-ah Yuva Utsav (Youth Festival) cum Cultural Day hman a ni a, district bawrhsap James Lalrinchhana chu khuallian a ni.
Khuallian chuan NYKS kaltlanga Mizoram leh India ram hmun hrang hranga hmalaknate chhuanawm a tih thu a sawi a, India ramin zalenna a hmuh a\anga kum 75 hnua \halaite hmasawn nana hmalak tawhna hrangte chu fakawm a tih thu a sawi.
Youth Festival cum Cultural Day hman kaltlangin \halaiteah hmasawnna tam tak tuh a nih ngei a beisei thu a sawi a, hmasawnna leh hun inherdanglam zelin hnam ziarang leh hnam nunphungte a lak bo loh nan leh hnam ziarangte humhalh zel a nih theih nana tanrual a tul thu a sawi a ni.
|halai kalkhawmte chu khawvel inthlak danglam zel dante thlir chunga rualelna dik tak nei tur te, an rilru sukthlekte a tha lam hawia thlaka thlen chin atanga hmasawn zel tum tur te, hnam dangte tih theih ang ti ve zel thei an nihna hria a, lehpel thei tura ngaihtuahna seng turin a fuih. Nun kawng dik leh hrisel zawh tur leh ruihhlo laka inthiar fihlim tura chahin, hmabak eng tak an neihte an theihna chhawr tangkai thiama tha taka hlen chhuah theuh tum turin a chah. Taimakna, tumruhna leh thuawihna nena theihtawp chhuah hram hram turin a fuih bawk a. Yuva Utsav hman chuan thalaiteah a tha lam hawia hmasawn duhna leh chona nasa zawk a pek ngei a beisei thu a sawi bawk.
Dinesh Jangid, DYO, NYK Champhai hnen a\angin Yuva Utsav huaihawt a nih chhante ngaihthlak a ni a, NYK chu India rama District 623-ah a awm thu leh \halaite hmakhua ngaia theihtawp a chhuah thin thu a sawi.
Sorkar laipuia Department of Youth Affairs hmalaknain Yuva Utsav-India @ 2047 hi India ram State leh District hrang hrangahte buatsaih a ni a, India ramin zalenna a hmuh theih nana hmalaknate bakah ram leh hnam hmangaihna thalaite thinlungah thuk zawka tuh a nih theih nana ruahman a ni. India ram hnam ziarang hausak zia pholan nan leh chawisan nana chhawpchhuah tum a ni bawk.
Yuva Utsav-ah hian Panch Pran tih chu thupui atana hman a ni a. India ram chu ram hmasawn zawk, saltanna rilru a\anga zalenna siam te, hnam ziarang leh hlutna chawisan te, inpumkhatna leh ram leh hnam tana inpekna thinlung pu tura tanlakte chu a thuken pawimawh zualte a ni. Yuva Utsav-ah hian \halai kum 15-29 inkar an tel a, lemziah, hla phuah leh thlalak hmangtein intihsiak neih a ni.