Zach Bryan-a’n No.1 album a nei ve ta

Zach Bryan self-titled country-rock album ‘Zach Bryan’ chu Billboard 200 (albums) chart No.1-ah a debut a, he chart-a Zach Bryan album No.1 kai thei hmasa ber a ni. He album, hla 16 awmna hi tun kum li chhunga rock album zinga kar khat chhunga hralh that ber niin, kum khat chuang chhunga he chart-a rock album a No.1 leh vawi khatna a ni a, rock album-ah chuan kar khat chhunga stream nasat ber a la ni bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Zach Bryan album ‘Zach Bryan’ hi a album puitling palina a ni a, country leh rock album hi Billboard Top Country Albums leh Top Rock Albums chart-a lang thei tur chi angin an sawifiah a, Zach Bryan bakah hian hetiang country-rock album tichhuak tawh country star lar an awm nual tawh a chung zingah chuan Jelly Roll, HARDY, Robert Plant leh Alison Krauss bakah Koe Wetzel te pawh an tel.
‘Zach Bryan’ hi kar khat chhungin US-ah 2,00,000 an hralh thei a, chung zinga 1,81,000 chu streaming atanga album tlukpui (on-demand official stream maktaduai 233.09) niin, album tak tak hralh zat chu 17,000 a ni a, album-a hla mal hralhna atangin 2,000 a tling thei bawk.
‘Zach Bryan’ bakah hian chart top 5-a lang album pali te chu chart No.1 hlui vek an ni a, Travis Scott ‘Utopia’ chu 91,000 hralh lehin No.1 atangin No.2-ah a tawlh a, Morgan Wallen ‘One Thing at a Time’ chu 83,000 hralh lehin No.2 atangin No.3-ah a tawlh a, Taylor Swift ‘Midnights’ chu 49,000 hralh lehin No.5 atangin No.4 a kai thar leh a, SZA ‘SOS’ chu 48,000 hralh lehin No.11 atangin No.5 a kai thar ve leh ta bawk.
Barbie soundtrack chu 48,000 tling lo deuh hralh lehin No.4 atangin No.6-ah a tawlh a, Peso Pluma ‘Genesis’ chu 43,000 hralh lehin No.9 atangin No.7 a insawn a, Taylor Swift No.1 album hlui ‘Lover’ chu 43,000 tling lo deuh hralh lehin No.8-ah bawk a awm leh a, Swift album dang, chart No.1 pawh lo ni tawh ‘Speak Now (Taylor’s Version)’ chu 41,000 hralh lehin No.7 atangin No.9-ah a tawlh a, chart No.1 hlui tho Morgan Wallen ‘Dangerous: The Double Album’ chu 40,000 hralh lehin No.10-ah bawk a la awm.