Zah taka upate enkawl kan intihhmuh a pawimawh hle – K Sapdanga

Zah taka upate enkawl kan
intihhmuh a pawimawh hle
– K Sapdanga
Inchhungkhurah leh khawtlangah thalai zawkten kum upate zah taka enkawl kan intihhmuh a pawimawh tih Home minister K Sapdanga chuan a sawi.
Mizoram Upa Pawl Thawhlehni khan Aizawlah general assembly vawi 50-na an hmang a. Hmanpuitu Home minister chuan, kum upat vanga mahni inchhung ngeia inthlahrun phah chu thil awmthei a nih rualin, chhungkaw puitling din tura rilru, tha leh sum an lo sen tawhna zawng zawng avangin inthlahrung tur an ni lo tih a sawi. “Kan inchhung khur leh khawtlangah thalai zawkten kum lama upate duat thiam a, zah thiam a, kan tun dinhmun min thlenpuitu an ni tih hrereng chunga zah taka enkawl kan intihhmuh a pawimawh,” a ti.
Kum lama upa, tawnhriat ngahte intelkhawmna, MUP din a nih atangin khawtlang leh ram inkaihhruainaah an thawhhlawk tih a sawi a. An upat puite harsatna sutkian kawngah pawl tangkai an ni, tiin, Mizo nun zemawi, khawtlanga nungchang mawi, tlawmngaihna chawinun leh aia upa zah zirtir kawngah thawktu tangkai an ni tih a sawi.
General assembly-ah hian assembly hnuhnung ber leh tun inkara an member thi mi 1804 sunna an hmang a. Report-a tarlan danin, Mizoram Upa Pawl hi 1957 January 4-a din a ni a. MUP general headquarters hnuaiah district headquarters 8, area 90, branch 589 leh member 70102 an awm. Mizoram pawnah branch 1 leh area 13 an awm a ni.
MUP hmalakna hrang hrang tarlan zingah, Social Welfare & Tribal Affairs department hnuaia Multi Service Centre building Zemabawka sak mek a ni a; MUP Headquarters building sak zawmna tur ruahman mek a ni. Upa pension Rs. 1000-a tihsan a ni a, he pension dawng mi 24524 an awm mek.