Zahmawh rawngkai innawrluih thubuaiah Soulja Boy $4M chawi thu pe

Zahmawh rawngkai innawrluih thubuaiah Soulja Boy $4M chawi thu pe
Rapper Soulja Boy, a hming tak DeAndre Cortez Way chu sexual assault civil trial-ah thiam loh chantir niin, dollar maktaduai 4 chawi tura tih a ni.
Hmeichhe pakhat, a hming lema Jane Doe tih hmangin California-ah lawsuit hi file-in, Soulja Boy chu zahmawh rawngkaia innawrluih leh kut inthlak bakah rilru inhliam sak leh hlawh pe duh lo-ah a puh a, heng a puhnaah hian Soulja Boy hi thiam loh chantir niin, dollar maktaduai 4 chawi tura tih a ni.
Jury-te chuan dollar maktaduai 4 hi zangnadawmna atan pek hmasak phawt turin an ti a, Soulja Boy hremna tur dang chu la ngaihtuah leh tura tih a ni.
Jane Doe hian a lawsuit hi 2021-a a file kha niin, 2018 atanga 2020 a Soulja Boy personal assistant anga a thawh chhungin Soulja Boy nen hian mahni duhthlannaa an inkawp tho rualin, a taksa mai bakah zahmawh rawngkaia innawrluihna a thleng fo niin a tarlang a, Soulja Boy hian tum 10 aia tam a lu-ah a hnek nia a tarlan bakah zahmawh rawngkaia innawr luihna pawh a tawk fo a, a chang chuan hetiang hi ni khatah tum hnih te a tawk niin a tarlang bawk.
Soulja Boy chuan Jane Doe puhna te hi dawt muhlum ni a sawiin, “Mut dun a duh leh duh loh ka zawt a, a remtihna vek a ni. A tang eih lo va, ti suh pawh a ti lo, chutiang engmah a awm lo,” tiin tan a khawh ve thung.