Taylor Swift-i’n Kanye West legal notice pe

Taylor Swift-i’n Kanye West legal notice pe
Social media lama Kanye West sapatal velin zahmawh zet maiin Taylor Swift chungchang a sawi hmiah hmiah mai a, Swift hian ngawihbo mai chi-ah ngai bik lovin, Kanye lakah dan tlawhchhanin hma a la ve ta a, ‘cease and desist’ file-in, Kanye chu a lakah dan hmanga serious zawka hmalak a nih loh nan a thil tih te tawpsan tura hriattir a ni.
Kanye leh Taylor inkar hi a buaina a rei tawh fû mai a, Kanye zawk hian stage leh online lamah Taylor Swift hi a khat tawkin a bei leh zauh thin a, tun tumah pawh hian ‘X’-ah Kanye hi a sapatal a, a duh duh a post deuh pawp pawp a ni deuh ber mai a, Taylor Swift chauh ni lovin, Harry Styles leh Justin Bieber te pawh a hmer tel.
Kanye-a’n ‘X’-a a thu post hi a nihna ang anga tarlan chi pawh ni lo khawpin a zahmawh a. Taylor Swift hian Harry Styles leh Justin Bieber chu a rualin mipat hmeichhiatna a hmanpui ni a sawiin, Styles leh Bieber te chuan Swift hi a rualin a hma leh hnunglam atangin khumlaizawlah an kuah rawn niin a sawi a, Taylor Swift a la mutpui ve lo chu a lungawi loh thu te a tlangau pui piap piap mai a ni. Kanye chuan a thu post te chu “1000%-in a dik,” a la ti zui. Kanye hian heng a thu post te hi delete leh tawh mah se a pawi tur ang chu a pawi hman tawh tho.
Taylor Swift legal team chuan case lian zawk an siam hmaa a thil tihte lo tawpsan nghal tura mumal deuh taka hriattirna ‘cease and desist’ hi Kanye hnenah an pe ta a ni.
Zahmawh taka a puhna bakah Kanye chuan Super Bowl halftime show-a perform tura an sawm lohna chhanah Swift chu puh telin, “Super Bowl-a min sawm duh lohna chhan pathum a awm. George Bush-a’n mihang engatan mah a tih lo. Taylor Swift movement vang. MAGA lukhum ka khum vang,” a ti bawk. MAGA hi Donald Trump-a campaign au hla ‘Make America Great Again’ tihna a ni.
Taylor Swift leh Kanye te buaina hi a bul tanna chu 2009 MTV Video Music Awards kha niin, kum tihlaia kum 20 mi, Taylor Swift-i’n best music video award a dawn lawmthu sawi tura stage-a a awm laiin Kanye hian stage-ah lawn chilhin, microphone a lak sak a, “Yo, Taylor, ka lawm pui che, ka sawi zawh tir tho ang che. Mahse, Beyonce video tluk tur a awm lo! Video awm tawh zawng zawnga tha berte zinga mi a ni,” tiin Swift hi hrilhhai takin a siam a. Mahse, Beyonce hian a award dawn lawmthu sawina tur hunah Taylor Swift tan lawmthu sawina hun a siam sak ve ta zawk a ni.