Zakapa Award dawngtu Dr Rinawmi

Hmeichhiate venhim leh an dinhmun chawikan kawnga hnathawk tha chawimawina, Zakapa Award 2023 chu state pawn lama Mizo hmeichhia puih ngaite pui fo thintu, theologian-activist Dr Lalrinawmi Ralte hnenah hlan a ni.
Award hlantu chief minister Zoramthanga chuan Mizo hmeichhiate chhan tura engkim chan huam lal Zakapa chu Zofaten hrerengin, huaisen takin a hnung zui turin a sawm a. “Keini pawhin he hnam chhan tur hian theihtawp kan chhuah zel anga, hnam thinlung nghet tak pu in, hnama min dintu Pathian hrerengin kan bei zel dawn a ni,” a ti.
Zakapa Award Organising Committee chairman, Social Welfare & Tribal Affairs minister Er. Lalrinawma chuan lal Zakapa chu a thih hnu kum 130 ah hmeichhiate humhimtu a nih hriatreng leh chawimawi chu a hlu tih a sawi a. Tlai tawh hle angin lang mah se, a hnathawh ropui tak avang hian a hming hi Pathianin a bo pil a phal loa, tunah ropui takin a vul leh ta tih a sawia ni.
Sailulak lal Dokhama fapa, Zakapa hi 1839 ah a piang a, Khawhri khuaa a lal lai, 1891 kumtir lama South Lushai Hills superintendent CS Murray-a’n an khuaa a awm laiin nula a phut a, ‘kan hnam dan a ni lo’, tia hnialin an khaw nulate a hum a, an inbeih zui phah nghe nghe a ni.
Zakapa Award hi Mizo hmeichhiate himna leh an tana thawhhlawk, mimal, pawl leh a dangte hnena pek theih a ni a. Tehfung 10 siam hmangin a awm ber thlan a ni. Sem hmasak ber dawngtu Dr Lalrinawmi Ralte, Tlangnuam Aizawl hi theologian a ni a, professor (Rtd) a ni. Pathian thu lam leh hmeichhe chawikanna lam hawi lehkhabu pawh engemawzat a ziak tawh a; hmeichhia leh naupang chanhai leh puih ngai, a bikin state pawnlamah Mizo hmeichhia harsatna tawkte chhan hna vawi tam a lo thawk tawh a ni. Chawimawina hian thuziak leh sumfai nuai khat a keng a ni.