Zalen tumin MNF-in a la bei reng – MNF NCC member

MNF chuan zalenna nei turin silai tel loin a la bei reng tih MNF National Core Committee member D Thangliana chuan a sawi.
Thawhlehnia MNF Aizawl East-I, North Block-in political training an neih a hmanpuinaah MNF party thuneitu sanga member D Thangliana chuan silai nen kum 20 chhung MNF-in zalenna a sual a, remna neih hnuah silai telloin, dan hnuaiah zalenna hi MNF-in a la sual reng a, an party dan bu ah pawh zalenna sang ber nei tura an thil tum hi ziahlan a ni tih a sawi.
“Party dang chuan rorelna chan tumin theihtawp an chhuah a. MNF chuan sawrkarna chauh neih tum loin, zalenna nei turin kan la bei reng a, party dang nen khaikhin theih kan ni lo. Kan sakhua humhalh leh tundin hi kan kalphung a ni a, kan kalsan thiang lo. Barhluih hnuaia India-a kan lut hi zalen ni kan la nei ngei ang,” a ti.
MNF chu hnam movement hruaitu leh kengtu, Mizoram chhung chauh ni lo, khawvela Zofa awm zawng zawngte tana hnam movement hruaitu a ni tih D Thangliana hian sawiin, “MNF a awm chhung chuan he nihna hi kan kalsan ngai dawn lo. Mipui sawrkar bawk din leh turin MNF a inbuatsaih a ni,” a ti.