Zalen zawka grape wine hralh tir turin CM ngen

Champhai Grape Growers Society Winery chuan grape wine chu ‘food item’ a nih angin zalen zawka an hralh theih nan leh vendor system pawh mumal zawka kalpui turin chief minister an ngen.
Champhai Tlangsama Champhai Grape Growers Society Winery chu Nilaini khan chief minister Lalduhoma hian a tlawh a. Society hotute chuan grape wine an tharchhuahte hlawk leh zau zawka an hralh theih nan sawrkar hmalakpuina an lo ngen a. Grape wine chu food item a nih anga zalen taka hralh theih an duh thu leh license- vendor system pawh mumal zawka kalpui an duh thu an lo hrilh.
Chief minister hian Grape Growers Society chu an grape leh wine deh chhuah hralhna kawngah sawrkarin thahnem a ngaihpui hle a ni tih a hrilh a. An thilsiamte awmze nei leh hlawk zawka an hralh theih nan hma an la dawn a, grape chauh ni loin thlai dang atanga siamchhuah thil pawh an ngaihtuah tel dawn tih a hrilh.
“Mizoram sawrkar chuan flagship programme ‘Bana kaih Policy’ hmangin kuthnathawktute khai chhuah a tum mek a, he policy hnuaia hamthatna pawhin an mamawh dan azirin an dil thei a ni,” a ti.