Zalenna sual tak tak loa min puhtute hi a tel ve peih lo an ni – Zoramthanga

MNF-in zalenna an sual tak tak lo nia sawi thin tute chu zalenna sual laia tel ve peih lo te an ni tih MNF president, chief minister Zoramthanga chuan a sawi.
Sawrkarin West Phailenga Community Service Centre a sak thar leh Residential School artificial football turf a phah thar a hawnnaah Zoramthanga chuan, party dang candidate-te an tha lo ni loin, hmasawnna hna thawk turin MNF chu a zik chhuahna tobul a dik bik tih sawiin, “Zalenna an sual tak tak lo, tia min sawiseltute hi zalenna sual laia tel ve peih lote an ni. Party thenkhat chuan remna kan neih kum, 1986 atang tawhin ‘min han chhin teh u’ an ti thin. An va belchiang a, party dangah an lo peng leh hman zel a, vawi sawm chuang pema tui anga nghet lo an ni. Chuvangin heng mite hi under 10-ah bak an awm ngai lo,” a ti.
Kum nga kaltaa hmasawnna enin, tute nge ngawi renga hna thawk tih a hmuh theih thu a sawi a. Thenkhat chuan hmasawnna engmah an hmu lo a, beidawngin mipui an dah tih a sawi. “Mipui beidawngte hip na’n kalphung thar an zuar a. Kum 40 deuhthaw an au tawh a, mipuiin tute nge an nih an hrechiang a, an enchhin duh lo,” a ti.
Sports minister Robert Romawia Royte pawhin thu sawiin, mi thenkhatin silpaulin bak phah theih lohna tura an ngaihah America siam phullem an phah thei chu state dangte awh tham a ni a, neih ve phakah pawh an ngaih loh niin a sawi.
Tlawng thlang lamah thil tha an chhuak ngai lo an tih thin thu sawiin, “Dampa Savawm, Mamit Keite leh Hachhek Sakei-te thawkho turah Mizo mipui hian hmasawnna an hmuh duh chuan khawthlang lam an hawi dawn. Hmasawn tumte chu khawthlang lamah an rawn kal zel dawn,” a ti a. Chief minister-in khawthlang lam hawiin hmasawnna bul a tan dawn tih a sawi.
Mizoram State Sports Council hmalakna – New West Phailenga Community Service Centre hi PMJVK hnuaia cheng nuai 140 senga sak a ni a. West Phailenga Residential School sakna atan hian PMJVK hnuaiah tho kum 2019- 2020 khan cheng nuai 3286.34 hmuh a ni a, he project ken tel, tuna hawn tak artificial turf hi nuai 549.91 hmanga sak a ni. M/s Decor Gauhati chuan a phah hna a thawk a, March 2021-ah thawk tanin kumin July khan an zo a ni.