Serchhip by-pass road a National Highway No.54 laih zauh leh siamthat hna thawh mekah zangnadawmna la tur, tun thlenga la dawng lo nia insawite chuan zangnadawmna tihfel thuai phutin June 19 atang khan kawngpui dangin hnathawktute an dang.
Thudawn danin Serchhip by-pass road a ram nei zingah zangnadawmna la dawng ve lo te hian kumin May khan zangnadawmna an dawn tur tihfel ngiatin hnathawktute an lo dang tawh a; May 24 khan Serchhip addl. DC James Lalnithanga hoin ram neitute leh NHIDCL aiawhte inbia in, hemi tum hian NHIDCL lamin zangnadawmna la dawng ve lo te chungchanga file hi Delhi-ah a awm mek thu leh, an sum hmuh tur chu tihfel thuai an beisei thu an sawi a ni.
Hemi chungchangah hian addl. DC pawhin thil then dan a lo enpui tur thu sawiin, kawngpui dan chu titawp rih tur leh kumin June 18 thleng ngaichang turin inremna an siam a. An huntiam a ral hnuah pawh zangnadawmna an lak tur tihfel ala nih loh avangin Thawhtanni atang khan kawngpui hi an dang leh tan a ni.
Tun tuma kawngpui dangtute zingah hian Serchhip by-pass road bakah Serchhip leh Keitum inkara ram neitute pawh an tel nia thu dawn a ni.
Zangnadawmna beiseituten kawng dang
Get real time updates directly on you device, subscribe now.
Prev Post
Next Post