Zanin mipa semi-final: Hunthar vs Chhinga Veng
Tata SK 712 Pro Volleyball League khelh mekah hmeichhe lamin semi-final khel zoin final lut tur an tichiang tawh a, zanin hian mipa lamin last four match hmasa zawk an khel dawn a, zan dar 8 atangin a hmun ngai R. Dengthuama Indoor Stadium, Mualpuiah Hunthar leh Chhinga Veng Spikers an insu dawn.
Hunthar coach VL Malsawma Renthlei chuan an hneh tawh Chhinga Veng chu anni aia team tha zawk an nih thu a sawi a; team pahnih hi kar hmasa zirtawpni zan khan league kharnaah intawngin, set la hmasa zawk ni zel chungin Huntharin a tawpah 3-2-in an hneh. Vawi nga theuh an khelhah point 10 ve ve an hmu a, chak tlem zawk an nih vangin Chhinga Veng an hniam zawk a ni.
Zanin hian final luh inchuhin an inkhel leh nghal dawn a, Hunthar player pawimawh Zomuansanga’n a ke a tihnat avangin a dinhmun a chiang lo.
Sawma chuan, “Championship kal mekah keini aiin Chhinga Veng an tha zawk. Chuvangin kan hneh dawn a nih chuan a tha thei ang bera kan khelh a ngai,” a ti.
Tun season-a inelna vawi hnih awm tawhah Hunthar an champion ve ve a, rin ber ni chungin Pro Volleyball-ah bul an tan. TNT tih loh team dang hneh vek mah se an inlan hnuhnun vawi thumah chet harsatin Tuipuiral leh Spi-kers lakah hnehna an sualchhuak hram.
Hunthar coach chuan sawizawmin, “Keini hi team inkhairual tha tak anga kan lan laiin thenkhat an lo uaithla lam deuh tawh a, kan beisei ang takin kan khel chhuak zo bik lo.
“Chhinga Veng kan hneh tawhna kha chu awmze nei lo a ni a, chak tumin min khel lo a, inzirna’n min hmang ni berin ka hria,” a ti a, hemi tum hian Zomuana’n a ke dinglam a bilh tawh bilh nawn lehin lakchhuah a ni a, Thawhlehni thlengin a la ring ngam tawk lo.
Khawhai tlangval hian vawi nga an khelh tawhah point 59 hlawhchhuakin 37 a paih a, Punjab police Gagandeep Singh chuan point 110 hmuin 53 a hloh ve thung a, ani tih lohah Hunthar tana thawhhlawk a ni.
Kum 2017 leh 2018 champion Hunthar boss Sawma chuan, “Semi-final-ah vawi hnih kan tla zawn mek a, engti zawng pawhin chak kan duh tak zet a, theihpatawp kan chhuah a ngai hle a ni,” a ti.
Chhinga Veng an hneh tumin captain Remsangzuala’n a khel tha hle a, setter zinga khel tha bera thlan hmasak ber leh awmchhun a ni rih. Ani hi Hunthar chakna hnar pawimawh niin, tawnhriat nei tha Laldensanga leh Lalramnunfela’n san lai leh hniam chang an nei a, point 47 leh 38 an thawkchhuak tawh.
Chhinga Vengin nikumah chhiat an tawk nasa a, champion lai ni chunga league vawi li an khelhah an tlawm vek. 2022 champion Durtlang North atangin Lalbiakmuana an lakluh bakah Rajas-than atanga an chawkluh Javed Khan nen team danglam an din.
Coach Jesse Lalpianpuia chuan Hunthar nen an inkhelh tumin set thumna leh linaah Javed a awltir a, “Kha inkhel khan awmzia a nei tam tawh lo a, inhliam palh a hlauhawm avangin player thenkhat kan hahdamtir a ni,” a ti.
A vawihnihna’n champion thei turin Spikers-in beiseina an nei a, an khelh tawhah Javed chuan point 150 deuhthaw hmuin 61 a hloh a, Biak-muana’n 21 a paih laiin 80 a thawh bakah, zuang sang K. Lalfakawma’n point 55 a hlawhchhuak bawk.
Jesse-a chuan, “A laia kan nawr fuh chuan kan chan a tha dawn a, kan khelh chhoh dan atangin Hunthar hneh theih kan inbeisei. State dang atanga kan player lak a tha a, lehlam ban pharna chungah a vaw thei a, ani hi kan tan a pawimawh,” a ti.
3-1-a Durtlang North an hneh tumin Javed chuan vawi 41 vaw tlain 15 a hloh a, a la chetthat ber a ni. Biak-muana’n tihsual a nei tlem a, Hunthar hmaah vawi 22 hlap tlain inkhel tum khata point 20 a hmuh awmchhun a ni.
Captain leh setter ni bawk David Lalramhmachhuana chet danah 2019 champion Spikers an innghat tel hle ang tih a chiang. Lehlam setter Remsang-zuala nen team inhnehtawk leh in-tluktawk kara danglamna siam turin hmun pawimawh an luah dun dawn.
Zanin mipa semi-final: Hunthar vs Chhinga Veng
Get real time updates directly on you device, subscribe now.
Prev Post