Zarkawt BCA 2024 MBBA Season Opening Champion – Tpa Bunghai

Mizoram Basketball Association (MBBA) calendar 2024 khuhhawnna season opening chu tualchhung basketball club hlun pahnih Zarkawt BCA leh Khatla TBL-in chak ngei tumin June ni 21 zan dar 7 khan Hawla Indoor stadium, Republic Vengthlangah an khel a, 69-56-a chak Zarkawt BCA-in duhthusama thaim season bul duhthusamin an tan.
Inkhel Thlirna
MBBA ruahmanna awmsa thiah a ni a, semi-final lut turte hriat zet tawh awm mah se quartel-final atanga khelh a ngai leh hnuhnawh – he ruahmanna chawpchilh chiri tak, team 14 zet karah hian Saron BC leh Chhinga Veng BC-te thawm a na fal hle – anni club thangduang pahnih hi ngaihthah a chi lohzia chu an game thlirin a chiang!
A tawpah erawh BCA leh TBL bawkin tualchhung inelnaah hian final an lut leh.
Mizo basketball ngaina tam takin hnam dang tel lohna tournament liana tualchhung tlangvalte final-a an innuai hi a hmunah leh MBBA Youtube channel lamah an thlir rawn thuap a; tum dang ang bawkin BCA leh TBL inkhel hi boruak a tang leh viau.
BCA captain Matthew Sailoin fit 6’5 zeta hrawl a nihna a hmangtangkai leh a; MSL lama hnamdang palian karah pawh dam dupa khel tha mar pat chhuak deuh reng thei thin hian fans lam koh duatna ‘the gentle giant’ a nihna ang ngeiin fîm leh fing takin – TBL fachuam Thianga leh India National Camp lamah pawh lo zuk inkulh tawh |hazualate tan a hnawksak leh pek hle.
Zarkawt BCA squad chhah zet, awmze neia remkhawmtu an head coach – Marc Tetea Sailo leh Kanan veng pa, K-a ten an key player Zonuna hrem a nih hnuin, Sangsanga tan hun tha an pek chu he Chawlhhmun tlangval hian tlin takin a hlenchhuak.
Junior player-te’n nuam ti taka an khelh theihna’n player langsar Lalrina Renthlei pawh defense lama a che vel a zangkhai viau – points nei tam aiin teammate-te tan a inpumpek.
TBL lamin an head coach Saron Mapuia awm lo mah se assistant coach Simon-a kaihhruaina hnuaiah players phur leh nung tha zek zawkte’n BCA hi an dang thei riau bawk.
BCA point guard Zonuna awm loh hnua Sangsanga dang thei tura ruahman lawkna an neih loh erawh an tuar zui!
Club tha pahnih hian squad an nei chhah viau a, first five chan ngei tuma anmahni club chhunga an inelna pawh a sang viauin a rinawm.
Intihsiakna awm chho tura an inhmachhawn zui tur hi tualchhung basketball chevel chhehvel hre zet, Tuikual South Val Robert Tlau (Robs Tlau) chuan, “Basketball hi technical game a nih angin FIBA rules hi hriat chian a ngai hle. TBL Sr. players awm lo leh BCA squad inremkhawm mawi takte hi thlir zui a chakawm.
“Mizo basketball living legend Mapuia ho hian TBL hi an inthuam chak ta bawk a, ennawm chhawpchhuahin a awm zui zel ang…”
Inkhel Stats
Match khata points 100 chuang harsa vak lova nei thei mai zel club pahnih hian final boruak tang tak karah beisei inkhel an chhawpchhuak pha lo deuh.
Match stats. atang hian inkhel en lo tan pawh game riruang a mitthla theih e. Chutih rualin, stats. hmanga inkhel khaikhawm erawh a rem lo – Lebron James aia Michael Jordan a chungnun tlat hi!

ZARKAWT BCA

Lalhmingsanga 25 pts. – 6 reb. – 4 ast.
Lalrina Renthlei 17 pts. – 3 reb. – 1 ast.
Lalnunpuia Renthlei 14 pts. – 2 reb.

KHATLA TBL

Vanlalthazuala 18 pts. – 9 reb. – 3 ast.
Emmanuel VL Awmpuia 16 pts. – 5 reb. – 1 ast.
K. Lalthianghlima 9 pts. – 15 reb. – 1 ast.