Zarkawt BCA an chak nghal

Zarkawt BCA an chak nghal
March 16, Ningani zan khan Mizoram Super League (MSL) semi-final thawh khatna khelh a ni a. Champion tura rinkai Zarkawt BCA chuan awlsam takin Bungkawn LB Associates an hneh a, final an hnaih.
Semi-final thawh khat naah Zarkawt BCA hian Bungkawn LB Associates lakah an khel tha viau a, quarter pali-ah chungnung zawkah an tang vek. An khingpui lakah hian tha takin bul an tan a, quarter hmasa berah point liin chungnung zawk an ni nghal. Quarter hnihnaah point hnihin an chungnung zui leh a, point ruka hmahruai chungin chawlhlawk an hmang.
Point ruka hmahruai tawh BCA hi quarter thum naah point ngain an chung-nung zui leh a, point 11 a hma an hruai fal tawh vangin chak turin an dinhmun a tha tawh hle. Dinhmun tha taka an din tawh vangin quarter hnuhnung berah inrintawkna leh phurna sang zawk nen an inlan theih phah am quarter hnuhnung berah hian point 14 zetin an chungnung zui leh ta cheu a. Point belhkhawmah point 93-68 a chakin final lut turin rahbi an tuk belh a, hma lam an pan hret.
Point 25 zeta an khing-puite an hneh tum hian Zarkawt BCA player pawi-mawh Joseph Allen chuan point 39 zet a thawkchhuak a, a chetha hle. BCA laka an tlawm tum hian Bung-kawn LB Associates player pawimawh Pleasant a che tha viau a, point 37 zet a thawk-chhuak.
Semi-final hi game thum khelh tur a ni a. Zarkawt BCA leh Bungkawng LB Associates te hian semi-final thawh hnihna hi zanin hian an khel leh nghal dawn a. An inkhelh nawn leh hunah an chak leh a nih chuan Zarkawt BCA hian final an lut tawh dawn a. Final-ah Khatla TBL leh Mission Veng Hot Shots te inkhela chak zawk zawk an hma-chhawn zui leh ang.