Aizawl West III bialtu MLA VL Zaithanzama chuan a bial huamchhung, Reiek kai Tlawng lei dawh hna thawh mek chu June 2 khan a hmunah a enfiah.
Reiek kai Tlawng Lei (Bug Bridge double lane) dawh mek hi Sadguru Engineer & Allied Services Pvt. Ltd. chuan thawkin kum 2017 atang khan hna bul tan a ni tawh a, zawh hun tura tiam vawi thum awm tawhin a hnuhnung ber kumin February 28-ah pawh hnathawh mumal hmuh tur a la awm lo. Tun dinhmunah structure bik zawh hnaih a ni tawh a, kumin chhunga zawh hman an beisei thu a hmuna vilpuitu PWD hotute chuan an sawi.
MLA VL Zaithanzama chuan Dampa bial khaw engemawzat leh Aizawl inkalpawhna Reiek kai Tlawng lei hi lirthei lian leh mipui mamawh tam tak thiarluhna hmun tur a nih dawn avangin a pawimawh takzet a, rokhawlhna leh harsatna hrang hrang avanga kum engemawzat hlamchhiah leh hnathawh mumal awm loa a awm hi a pawi takzet tiin a sawi. Tun dinhmunah tha taka thawh chhunzawm a ni ta chu lawmawm a tih thu leh hnathawh vilpuitu Mizoram PWD thawhrimna fakawm a tih thu a sawi a. Tha taka thawh a nih zel theih nan an vilpui reng dawn tih a sawi a ni.
Sadguru Engineer & Allied Services Pvt. Ltd. chuan an hnuaia hnathawkten harsatna hrang hrang an tawh thu leh tunhnaiah pawh nunna chan hial an awm thu sawiin, chak zawka hna thawh an tum thu an sawi.
PWD leh Sadguru Engineer & Allied Services Pvt. Ltd. hian inremna siamin 2019 February 28-ah zo fel tura tih an ni. Hna a kalmuan avangin 2021 May 31 thleng atan an zawh hun tur hi pawhsei sak an ni a. Thudawn danin, MPWD hian Sadguru hnenah show cause notice tum hnih leh superintending engineer (Central Circle) atangin tum khat an pe a, hemi hnu hian kumin February 28-ah zawh an intiam a ni. Reiek kai Tlawng lei zau zawng hi metre 7.5 (double lane) a ni a, a san zawng metre 7 niin metre 55 a sei a ni.
Zawh hleihtheih loh Tlawng lei dawh hna bialtu MLA-in enfiah
Get real time updates directly on you device, subscribe now.