Zelensky-a’n Trump-a nen inhauh a inchhir

Zelensky-a’n Trump-a nen inhauh a inchhir
Ukrainian President Volodymyr Zelensky chuan Thawhlehni khan tun hnaia Donald Trump-a nena an inhnial chiam chu ‘inchhirawm’ a tih thu a sawi a, US president kaihhruaina hnuaiah hian muanna tluantling nei tura ‘kawng dik zawh hun’ a nih thu a sawi bawk.
“Zirtawpnia Washington-a White House-a thil thleng kha beisei loh ang takin thil a kal a. Thil awm dan kha a inchhirawm hle a ni,” tiin Zelensky chuan X-ah a tar lang.
“Thil siam dik hun a ni a. Hun lo kal zelah chuan thawhhova inbiakpawhna tha tak nen kan tih zel ka duh,” tiin Ukrainian hruaitu hian a tar lang bawk.
Ukrainian President Zelensky-a nena an inbakkaih chiam tuk lawkah US President Trump-a chuan sipaia puihna a pek thin chu a titawp nghal a, Kyiv chu Russia nen inremna tura inbe turin na zawka nawr nana a tih a ni.
Kyiv-a thuneitute chuan indonaa US-in a puihnaah an lawm a, Washington nen thawhho zui zel an duh tih an sawi.
Ukraine leh a thawhpuite chuan Trump-a duh anga rang taka inkahhai kalpui chu Russia tan hamthatna ni thei turah an ngai a, Kyiv hian Moscow-in inkahhai chu tha taka a zawm loh an ring a ni.
White House thuneitu pakhat chuan US hian Kyiv a puihna chu indo tihtawpna tura tul a ni em tih ‘ennawnin a chawlhsan rih’ tih a sawi a. Puihna tihtawp chu Ukraine-in muanna atana inbiak a duh tak tak tih a tihlan hun thleng atana tih a nih thu a sawi bawk.
US-in Ukraine a puihna thin a titawp hian indonaah nghawng a neih nghal mai erawh a rinawm loh va. Ukrainian sipaite hian ral hmatawng km 1,000 chhungah Russian hma lam pan zel tur chu an timuang thei a, a bikin indona a nasat zualna, Donetsk region, Kyiv atanga khawchhak lam km 700 velah an dang thei zual.
Russian chetna hi sipai leh hmanrua zawngin an hek hle a, Moscow tana hlawkpuina tur a la tam lo hle.
February 24, 2022 atanga Russia-in a rûn mekah hian Ukraine hi ram dang puihnaah a innghat nasa hle a, Trump-a’n US-a thuneihna a chan leh hnuah puihna hi a tlem hlauh a ni.
US siam Patriot missile defence system chu Ukraine venhimna atan an hmang tangkai hle a, US hnuchhui miten Russian sipai chet velna an hre chakin bitum tur an hre fuh thei hle bawk.
Chhim lam lawngchawlhna khawpui, Odesa-a cheng, Olena Fedorova-i chuan Trump-a thutlukna hi a lailawk chauh a nih a beisei thu a sawi a, ‘puih kan ngai tak zet a ni’ tiin a sawi.
Europe-in Ukraine mamawh tak, boruak atanga beihna laka invenna an phuhruk zawk loh avangin Ukraine tan chuan US puihna hi a hlu hle tih dan siamtu, Yehor Chernov chuan a sawi ve bawk a. “Hetiang a nih chuan civil miten an tuar nasa zual dawn a ni,” a ti.
US-in sipai lama a puihna a tihtawp hi Poland-ah pawh a lang nghal a, anni hi khawthlang ramte ralthuam chawlhpuina ber niin a lut a tlem tawh niin Polish Prime Minister Donald Tusk chuan a sawi.
Trump-a’n White House a luah leh hnuah US leh Ukraine inkar hi a hniam hret hret a, Trump-a sorkar hian Russia sorkar be tawhin hei hi an inkar tichhe zualtu pakhat a ni.