Zelensky leh Xi-an phone-call an nei

Ukraine’s Volodymr Zelensky chuan ‘hun rei tak leh awmze nei takin’ phone call China Xi Jinping nen an nei tia sawiin hei hi Russia-in Ukraine a run hnua an inbiakna hmasa ber a ni.
Inbiakna an neih bakah Beijing-a Ukraine ambassador dah chuan ram pahnihte inlaichinna tha zawkin a thlen a beisei thu a sawi bawk a.
China pawhin inbiakna an neih hi tarlangin ‘remna lamah a tang zel a ni’ a ti ve bawk a. Khawthlang ram ang lo takin Beijing chuan Russia-in Ukraine a runah neutral a nih thu a tlangaupui thung.
Mahse Moscow a hnaih em emna chu a zep ngai chuang lo va, Moscow demna a la sawi lo bawk a, thla kalta khan President Xi chuan ni hnih chamin Russia a tlawh zui bawk.
President Putin chu ‘thian tha’ tiin a sawi zui bawk a, China chuan Ukraine indona a tawp theih nan ’12-point peace plan’ siamin China chuan kawngdik zawh a duh zel a ti bawk.
Inbiakna an neih hnuah President Xi pawhin China chu ‘majority ram mawhphurhna nei’ a nih angin, ‘kangmei thleng mek chu lehlam atanga thlir emaw a alh zual nana tuahbelhtu emaw harsatna thleng mek chu hlawk nana hman tum a ni dawn lo’ a ti.
China president thusawi hi khawvel huapa a elpui ber US a beihna anga ngaih niin US chuan Russia indona kalpui mekah Ukraine tanpuina nasa takin a pe mek thung.
White House thupuangtu John Kirby chuan ram pahnih hruaitute phone call chu ‘thil tha’ tia sawiin mahse inremna tluantling awm theih nan emaw ruahmanna tha siam a nih leh nih loh sawi turin a la hma lutuk a ti thung.
Ukraine indonaah China inrawlhna chuan a titawp dawn em tih chu thil chiang lo tak niin a chhan ber pawh Russia chuan Ukraine ram atanga a sipaite hnuhkir tumna a la nei lo, chutak chu President Zelensky phut ber a ni thung si a. “Kan ram chanin inremna siam a ni ngai dawn lo,” a ti bur thung.
Russia chuan China-in inremna awm nana hma a lakna chu a huapzo tia sawiin mahse Kyiv-in phut a neih awm ang lo lutuk chu mutan a ni a ti thung. Moscow-in phut a neih zingah Ukraine ram a awp mek leh kum 2014-a a chhuhsak Crimea te pawmsak a ni.
China-in inremna a awm theih nana 12 point plan a siam hi Ukraine chuan a hnawl bawk a. China ruahmanna siamah a ram Russia-in a chhuhsak mek chungchang engmah sawi lan a awm lo a ti bawk.