Zirlai naupangte tan Mizo tawng leh Hindi-a tawng hun siam dawn

Mizo naupang zingah school-a Sap tawng an hman luat avanga pawnlam thlenga Sap tawng an uar ta lutuk chu sawrkarin ngaimawhin, school-ah Mizo tawnga tawng hun an siam dawn. Hetiang bawk hian eizawnna atana pawimawh nia hria in, nakin zela Hindi an thiam chhoh hma theihnan Hindi-a tawng hun siam tum a ni bawk.
Mizoram Education Reforms Committee-in a kaihhnawih pawl leh mimal pawh telin, inrawnkhawm a buatsaih zulzui leh zirchianna atanga school leh zirlaite kaihhnawih thil hrang hranga ruahmanna thar an siam chungchang chu chiang zawkin School Education minister Dr Vanlalthlana hoin an sawifiah a. Zirlai tam takin in lama an tawng hman (home language) thlauthla a, Sap tawng an hman nasat lutuk tawh avangin Mizorama kan tualchhung tawng humhalh a nih theihnan English Medium School-ah ‘Home Language Day’ hmang turin hriattirna siam a ni dawn tih a sawi.
Home language hi class period karlaka chawlh awm remchangah zirlaiten in lama an tawng hman chu inthlahrung hauh loa hmang tura tih an ni dawn tih a sawi a ni.
Hetiang bawk hian, Mizorama chengten Hindi kan thiam loh em avangin state pawna kan kalin harsatna namen lo kan tawk thin tih minister hian a sawi a. India rama awm kan nih vang ai mahin, zirlaite leh hna zawngte tan Hindi tawng thiam chu a tangkai an tih avangin, school zawng zawngah ‘Hindi-a Tawng Ni’ hmang turin thu an chhuah a. Thla khatah vawikhat niin, class chawlh laia hman tur a ni tih a sawi.
Mizoram Education Reforms Committee vice chairman Prof Lalbiakdiki Hnamte chuan, Hindi tawng uar tura intihna hi Vai inthuama inthuam tir lam a kawk loa, a tawng hi hmang thiam se an duh chu a ni mai tih a sawi a ni.