Zirlai tan environment humhalh lam hawiin intihsiak an buatsaih

Zirlai tan environment humhalh
lam hawiin intihsiak an buatsaih
December 2 kha National Pollution Control Day a ni a, hemi denchhen hian Mizoram Pollution Control Board hnuaia Environment Education Programme (EEP) chuan online competition hrang hrang a buatsaih.
Primary leh middle school chin tan online-a poster insiamsiak a ni a. A thu hawi lam atan “Stop Pollution, Save Earth” leh “Pollution: The Silent Killer” tih a ni. Primary level-ah zirlai 107 leh middle level-ah zirlai 101 an tel.
High school leh a chunglam tan leh college level tan online-in quiz inelna buatsaih a ni a, “Environmental Pollution” tih thupuia hmangin naupangin quiz hi Google form-ah an chhang a, result hi December 4-ah puan a ni ang. A titha zual 10 hnenah lawmman leh e-certificate pek an ni ang. Hei bakah hian mipui hnenah awareness atan e-poster siam niin, thehdarh a ni.
National Pollution Control Day hi India ramah December 2 hian kumtin hman thin a ni a. He ni hi ‘Bhopal Gas Tragedy’ tia hriat, 1984 December 2&3 a chhiatna thleng hriatrengna atan leh pollution chungchanga awareness neihna atan hman thin a ni.