Zirlaibu tel loin thiamthil zir nan ni 10 hmang dawn – Education minister
Zirlaibu tel loin thiamthil zir nan
ni 10 hmang dawn – Education minister
Zirlaiten kut themthiamna lama hma an sawnna atan school-ah thiamthil zirna’n kum khat chhungin ni 10 chhung chu zirlaibu tel loin hun ruahman a ni dawn tih School Education minister Lalchhandama Ralte chuan a sawi.
School Education hnuaia Adult Education-in model centre hrang hranga eizawnna kawnga thiamthil zirna, Ramhlun South leh Chawnpui Veng Model Centre-a an buatsaih chu Nilaini khan khar a ni a. He hun hmanpuitu School Education minister chuan National Education Policy 2020-in skill development a ngaipawimawh a, school-ah pawh thiamthil zirna’n kum khatah ni 10 chhung chu school bag keng loa hun hman tum a ni a, hemi mil hian school calendar pawh siam a ni, tiin a sawi.
Adult Education-in skill development lama huang a zauha hlawhtlinna lang chu lawmawm a tih thu leh zau zawka hma lak zel a beisei thu a sawi a. Zirchhuakte chu an hlawhtlin leh hlawhtlin loh anmahni kutah a awm dawn, tiin, teirei peih a, taimak leh tumruh bakah hmathlir fel tak nei turin a fuih.
Mizoram sawrkarin skill development-ah LESDE atangin lian takin hma a la mek tih LESDE minister ni bawk Lalchhandama Ralte hian a sawi.
Adult Education lam hotute sawi danin, eizawnna kawnga thiamthil zirna an buatsaih hi model centre hrang hrangah a ni a, Aizawlah chuan Chawnpui leh Ramhlun South Model Centre-ah te kalpui a ni a. Lawngtlai leh Mamit-ah te hetiang hi buatsaih a ni bawk.
Heng centre hrang hrangah hian thiamthil an zirte chu eizawnna leh bank chhawr tangkai tura hriat leh thiam tur pawimawh chi hrang hrang – pickle leh jam siam, pangpar chin leh khawi, chhang ur, lu meh, hotel/ restaurant a thawh dan, pheikhawk chhe siam leh nihliap chhe siam te an ni. Ramhlun South Centre ah hian mi 34-in an zir a, an vaiin an zirchhuak. Chawnpui Centre ah hian mi 53-in an zir a, 47-in an zir chhuak. Lawngtlai Centre-ah mi 45-in an zir a, 39-in an zir chhuak a, Mamit Centre-ah 46-an zir a, an zir chhuak vek a ni. Centre palia zirte hi 178 an ni a, 166-in an zir chhuak a ni.