Covid hripui avanga kum hnih chhung nunphung a khaihlak hnuah, kum 2022 atangin ngai kan awh chho leh tan a. Kum 2022 chhunga Mizoram State Museum tlawhtu chu 1194 niin, hei hi kum khat chhunga sawrkar office working day atanga tehin, chawhrualin ni tin Museum tlawhtu hi mi panga an tling lo tihna a ni.
-- Advertisement --
State khawpui, mihring nuai li dawn awm ve tawhnaa Museum tlawhtu mihring kan awm mang lo hi thil mak tak a ni a. Hei hian hnam thil ngaihhlutna rilru kan put phak lohzia a lantir tiin sawi ta ila, a dikna chin a awm ngei ang.
Ram leh hnam chanchin hriat zau leh hriat thuk hi a pawimawh hle mai a. Ram dang leh hnam dang chanchin hre tak ni si, mahni ram leh hnam chanchin hre chiang lo leh sawi tur hre mang lova awm hi thil tha lo leh mualphothlak tak a ni a. Hnam chanchin hriatna nghet nei tur chuan a thua zir mai hi a tawk lo va, mit ngeia a taka hmuh hian hriatna a tinghet bik a. Chutiang hriatna nghet neih theihna khur tha tak chu Museum hi a ni.
Ram dang mi an lo kalin, an ngaih pawimawh zingah museum tlawh hi a tel deuh ngei ngei a. Hun rei lote an cham chhungin Mizo hnam chanchin an zirin an hre tak tak hman lo; mahse, museum an tlawh atangin hun rei lo te chhungin hnam chanchin tam tak an hre thei thung a, chu chu zin veivah hlawkpui nana hman an tum dan pawh a ni thin.
Aizawlah hian zirna in hrang hrang thahnem tak a awm a, heng zirna inte hian kum khat chhungin an zirlaiten museum an tlawh vek theihna tur hun remchang siam nachang an hriat a pawimawh dawn hle a. Zirlaibua a thua an zir, mit ngeia a taka museum-a an hmuh hnuah an hriatna a nghetin a chiang bik dawn a, chu chu zirlaite tan a hlawkthlak dawn hle a ni. Museum enkawltute pawhin zirlaite lo kaihhruai dan system fel tak lo ruahman thin bawk se, zirlaite tan a hlawkthlak lehzual ngei ang.
Kum 2023-ah hian khawpui chhunga zirna in zawng zawngte hian an zirlaite museum tlawhpui vek tumin ruahmanna siam thei se, zirlaiten an tangkaipui ngawt ang.
A va man hla em.