Zirlaite ‘ni khat atan BDO’ nih tir

Zirlaite ‘ni khat atan BDO’ nih tir
Sawrkar laipui ruahman, ruihhlo do beihpui peng khat – Nasha Mukt Bharat Abhiyaan hnuaia Lunglei district bawrhsap hmalakna kalzelah Tlabung RD Block-ah “Ni Khat Atan SDO(C)/BDO” tih hman a ni a. Tlabung RD Block-a zirlai thlan bik paruk chu SDO(C)/BDO hna thawh dan a taka an hriatna tur leh mawhphurhna pawimawh la ngam tura fuihphurtu atan SDO(C)/BDO thutthleng luahtir an ni.
Tlabung RD Block-a zirna kawnga titha leh entawn tlak zirlai – Lalpekhlua Jongte (class XI), Tlabung Higher Secondary School; Vanlalruati (class XI) leh Vanlalrinfeli (class XII), Tlabung Senior Secondary School; Subhodip Majumdar (class X), Govt High School Tlabung; K Lalnunpuii (class X) leh Remtluangpuii (class IX), Modern High School Tlabung an tel a. Zirlaite hi SDO(C) lirtheiin SDO(C) office thleng hruai niin, Tlabung SDO(C)/ BDO Moses Lalfakawma Tlau leh thawktuten an lo dawngsawng a. Office-a pindan hrang hrang an fanpui a ni.
Hun hmanah hian zirlaite hi BDO hnathawh dan leh sawrkar hmalakna (scheme) hrang hrang – MGNREGA, Pradhan Mantri Awaas Yojana (Gramin), Mizoram State Rural Livelihood Mission, Swachh Bharat Mission, adt. hrilhfiah an ni a. BDO thutthlenga thuin, mipui mamawh leh harsatna an ngaithla a, chhiatna thlen thulha hmalak dan leh block hmasawnna atana ruahmanna siam dan hrang hrang a takin an ti chhin bawk.
Tlai lamah “Ni Khat Atan SDO(C)/BDO” hun hman atanga an thil zirchhuah leh tawnhriat an inhrilhtawnna hun buatsaih a ni a. SDO(C) /BDO Moses Lalfakawma Tlau hian zirlaite hnenah hian thuziak a hlan a ni.
Lunglei bawrhsap hmalaknain “Ni khat atan Bawrhsap” chu August 27 khan Lungleiah neih a lo ni tawh a. He hmalakna hi bawrhsap ruahmannain block level-a chhunzawm niin, Tlabung leh Lungsenah neih a ni.