Zirlaite tana scho buaipui tha peih lo school an awm – MSU

Zirlaite tana scho buaipui
tha peih lo school an awm – MSU
An zirlaite tana scholarship an lak theihna buaipui sak peih loh avanga scholarship dawng ve thei lo tur an awm tih Mizo Students’ Union chuan an sawi a. Scholarship dilnaa harsatna leh hriatthiam loh nei tan an pui thei reng tih an sawi.
MSU Gen. Hqrs. president B Lalkhawngaihzuala chuan, kum 2023- 2024 a Mizo zirlaiten scholarship kan dawn tur chu 1st leh 2nd installment sem zawh a ni tawh a. 3rd installment buaipuiin Mizoram Scholarship Board secretary Dr PL Ramliana chu Delhi-ah thang mekin, tuna ministry lama an dil hi cheng nuai 806 a ni a, a rang lama sem thuai a nih theihnan MSU chuan a vil zui reng tih a sawi. Scho’ la dawng lo zirlai, post matric-ah 5450 leh pre matric 1155 ah an awm tih a sawi a ni.
Scholarship Board thawktuten theihtawp an chhuah lai hian, school thenkhata scholarship khawihtu institution nodal officer-te inthlahdah vanga zirlaiten dawng lo tur an awm tih a sawi a. Cherhlun Higher Secondary School (adhoc) a zirlai, scholarship dilte chu an school-in verification a tihsak loh avangin kumin hian scholarship an dawng thei dawn loa, thu an dawn danin Lungrang ‘S’ High School (adhoc) a thawktuten scholarship buaipui an thiam loh chhuanlamin an zirlaite tan an buaipui thei lo niin an hria tih a sawi bawk.
Hei hi MSU chuan pawi a tih thu an president hian sawiin, “Hrem ngai an awm a nih chuan a tul anga hremna lekkawh sak turin sawrkar thuneitute kan ngen a. Zirtirtu, naupangte tana intuaithar peih lo leh ngaihsak peih tawh lo an awm hi pawi kan ti a. Zirlaiten an hamthatna scholarship an hmuh theihnan hma min laksak turin sawrkar thuneitute kan ngen a ni,” a ti.
Scholarship dil duh zirlai, an institution-a thawktu lamin an buaipui peih loh hria an awm chuan MSU Gen. Hqrs hruaitute hnenah report tura an ngen bakah a dil dan thiam lo tan MSU Gen. Hqrs chuan an pisapuiah Scholarship Help Desk an hun thu a sawi a ni.