High school pahniha zirlaite chuan a thu leh a takin intodelh bul tan an zir a. Intihsiakna siamsak niin, a tithate hnenah lawmman siam a ni bawk.
-- Advertisement --
Aizawl North II bialtu MLA Dr Vanlalthlana chuan a bial chhunga sawrkar high school pahnih – Govt. Hrangchhuana H/S leh Govt Republic H/S zirlaite hnenah intodelh zirtirna programme, TiLi Entrepreneurship Mindset Curriculum (TEMC), Tharthilthlentu nena thawhdunna siamin an kalpui a ni.
Intodelh zirtir tur hian Indian Institute of Management (IIM) atanga zirchhuakte leh sumdawnnaa tawnhriat nei tawhte rawih an ni a. Kartin school pahnihah hian tum hnih hun an hmang. He programme-in a tum ber chu, school syllabus zirtir ruala zirlaite intodelh tura buatsaih a ni.
Hrangchhuana High School leh Govt Republic High School naupangte hi intodelh thei tura kawng chi hrang hrang hmanga hrual an nih bakah group 26-ah thenin Rs. 2000 theuh pek an ni a; an sum dawnte an peipun dan leh an kalpui dan chu intihsiakna atana hman a ni.
Inrinni khan a kharna chu bialtu MLA hian a hmanpui a. Zirlaite hian presentation pe in, pakhatna Rs.10000, pahnihna Rs.5000, pathumna Rs.3000 pek an ni. Intodelh zirtirna hi zirlaiten nuam an tiin an hlawkpui hle tih an sawi.