Zirlaite’n meizial leh e-cigarette an zuk loh nana hmalak dan tur an rel

Zirlaite’n meizial leh e-cigarette an zuk loh nana hmalak dan tur an rel
Champhai District Narco Coordination (NCORD) Committee chuan nimin khan DC Conference Hall, Keifangtlangah zirlaite’n meizial leh e-cigarette an zuk loh nana hmalak dan tur Champhai Bawrhsap leh Committee Chairman ni bawk Mohammad Aaquib hovin an rel.
He hunah hian Police te, Excise and Narcotics te leh Assam Rifles te’n ruihhlo an man zat hrang hrang an sawi a, Social Welfare office-in ruihhlo that lohna inhrilhhriat nana intihsiakna an buatsaih te, de-addiction centre an tanpui dan te, Education office-in sikul bula meizial zuk leh zawrh a tlem nana an hmalakna te an sawi bawk. Zirlaite’n meizial leh e-cigarette an zuk loh nana hmalak dan turte sawiho a ni a, meizial zuk leh zawrh phal loh chin (yellow line) siam belh zel a tul thu an sawi bawk.Public prosecutor lam atangin report hrang hrang ngaihthlak a ni a, conviction rate a san theih nan hma lak a tul thu sawi a ni.
Chairman Mohammad Aaquib chuan naupang leh thalai ruihhlo laka an fihlim theih nan NCORD hian chanvo pawimawh tak a nei tih sawiin committee member te mahni hnathawhnaa theihtawp chhuah turin a hrilh a, a hmuna ruihhlo man chauh ni loin ruihhlo laka fihlim tura mipui fuihna leh ruihhlo dinhmun hriat te pawh thil pawimawh tak tak a ni vek a ni tih a sawi a ni.
Champhai Police chuan October thla chhungin case 7 an ziak lut a, mi 18 an man. Heroin kg 4.638 an man a, LMV 2 leh two wheeler 1 an man bawk. Excise & Narcotics chuan tun October thla chhung hian Heroin 1.08 kg, Methamphetamine 12.221 g leh Alprazolam 43.5 g an man a, NDPS Act ‘85 hnuaiah mi 9 manin case 10 ziahluh a ni a, lirthei 2 an man bawk. Drug awareness campaign Govt. Model High School, Khawzawlah leh Buangah an nei bawk a ni.