Zirna atan awmze neiin fund hman a ni – Dr L Thangmawia

Zirna atan awmze neiin fund
hman a ni – Dr L Thangmawia
Sialkal Range Development Council fund chu zirna atan awmze neia hman a ni tih an chairman Dr L Thangmawia chuan a sawi.
Sialkal Range Development Council (SRDC) huamchhunga pawl 9 leh pawl 11 topper 13, New Delhi-a excursion-a kal turte chu Inrinni khan SRDC chairman, Lengteng bialtu MLA Dr L Thangmawia hoin thlah an ni a. Council meeting-in a lo rel tawh angin 2019 April khan zirlaite tan excursion neih a nih tawh sawiin, Covid leng vanga chhunzawm theih a nih loh hnuah neih a ni leh tur chu a lawmawm a tih thu a sawi. Hei hian zirlaite khawhawi tizau se a duhsak tih sawiin, zirlaite chu line hrang hranga mi hlawhtling an nih theihna’n excursion hi rahbi pawimawha hmang turin a chah.
Kumin HSLC leh HSSLC exam-a SRDC huamchhung zirna in atanga distinction-a pass-te chu smartphone leh laptop pek an nih tur thu leh SRDC area zirlaite tana sak Luangmuala Paite Tribal Girls’ Hostel pawh luah theih thuai a nih a beisei thu a sawi a ni.
A bik taka zirna lam ngaihtuahtu tura 2020 March-a din ‘Hostel & Education Committee’ kaltlangin SRDC huamchhunga zirtirtu indaihlohna chu SRDC Fund hmanga rawih an nih thu te, New Delhi-a civil service coaching kal zirlai pahnih cheng nuai chuang ve vea sponsor an nih thu te, National Defence Academy-a interview hmachhawn tur zirlai pakhat cheng nuai chuanga sponsor a nih bakah zirlai thiamthei, chhungkaw harsa 40 chuang tanpuina an pek tawh thu te, technician zir mek zirlai pathum an sponsor thu leh fashion designing zirlai pathum tho sponsor an nih bawk thu te SRDC chairman hian a sawi.
Mimbung HSS, Kawlbem HSS, Hrianghmun HS leh Vaikhawtlang HS te chu SRDC-in cheng nuai tela a tanpui thu te, zirna atana SRDC chuan nasa zawka ke pen zel an tum thu te a sawi bawk.
Faina lamah pawh hma la in, kumin hian fai inelna SRDC huamchhung khua leh institution te tan buatsaih a ni dawn tih Dr L Thangmawia hian a sawi a. Literature leh culture lama hma la turin ‘Cultural & Literature Committee’ chu SRDC hnuaiah din a nih tawh thu te, SRDC huamchhunga in chung rangva la nei lote kumin chhunga neih tir vek tura hma lak a nih thu te sawi a ni.