‘Zirna in sangah kan sang ber, doctor lak tur an vang’

Minister Dr R Lalthangliana chuan zirna in sangte tehnaah Mizoram hi India ramah a sang ber tih a sawi a, chutih rual chuan hriselna lamah erawh doctor lak tur an van avangin Mizoramin harsatna a tawk tih a sawi.
Ningani khan Budget Session-ah a demand sawihona hunah a hmawrbawktu-ah tangin, higher & technical education minister hian Mizoramah UGC recognised zirna in 23 a awm thu leh chung zinga 19 te chuan National Assessment and Accreditation Council (NAAC) te chuan NAAC valid accreditation an nei tawh tih te a sawi a, an hmu sang hlawm tih a sawi bawk.
India ramah hian Mizoram hi mark kan hmu sang ber tiin a sawi a, Mizoramin mark 83 a hmu a, a dawttu Chandigarh-in mark 60 an hmu tiin a sawi. “Kan achievement hi kan chhuang hle,” a ti.
Lunglei-ah chhim lam tan Mizoram University campus hawn tum a nih thu a sawi a, Pukpui-ah hemi atan hian ram a awm thu sawiin, Covid vangin sorkar laipui lamin harsatna an tawk a, chutiang karah chuan theihtawp chhuahin an nawr reng tih a sawi.
A department chan dang health department chungchangah doctor indaih loh thu a sawi a, member te’n an bialah doctor an indaih lo tih an sawite chhangin, thingtlanga awm aiin Aizawla private hospital-a awm an duh zawk tih a sawi.
“Kan sawm tlu thei lo. Aizawlah vel bawk lo chuan kan sawm tlu thei lo,” a ti a, an sorkar hnua an dinhmun a sawi a, 2019 hnuah doctor hi 22 an pension a, mi pali an boral a, PG zirin mi 25 an chhuak a, doctor 51 nei lo duak ang an nih thu a sawi.
ZMC-a professor tur pawh mi an sawm tlu zo hlei thei lo tih a sawi a, “Mihring hmuh hi a har em em a ni,” a ti.
Health department-a sorkar hmalakna a sawi zingah Mizoram State Super Specialty Cancer and Research Centre (MSSSCRC), khum 200 awmna tur, cheng vaibelchhe 700 senga din tum a nih thu leh 2028-a hawn hman tura beisei a nih thu a sawi.
Mizoram Health Care Scheme-ah inziaklut an tam ber laiin mi 113720 an awm thu a sawi a, inziaklut an tam bakah bill theih a pun thu te sawiin, Asian Development Bank pawhin Mizoram chu titha an ti tih te a sawi.