Zirtirtu inziak naupangte sawrkarin a nawr hran lo

Zirtirtu inziak naupangte sawrkarin a nawr hran lo
Sawrkar school-a zirtirtu zingah an kum ziak naupangte chu sawrkarin chawl turin a nawr lui hran loa, thenkhat chuan an pension hun tur dik takah ‘voluntary’ in an chhuak mai thung tih Education minister Dr Vanlalthlana chuan a sawi.
Thawhlehnia Assembly Session-a zawhna chhangin School Education minister chuan, sawrkar zirtirtu an kum ziak naupang zingah mahni kum dik taka pension duh an awm a, thenkhat chu voluntary retirement-in an chhuak a, kum 2025 chhung pawh khan hetianga chawl hi middle school-ah zirtirtu 9 an awm a, a dangah pawh an awm tih a sawi.
“Hemi a nih loh chuan sawrkarin inziak naupanga puha va nawr theih ngawt a ni lo. Rules hrang hrang a awm a, sawrkarin a lo pawm tawh si a, Chutiangin sawrkarin a hrana hma lak a tum lo,” a ti.
Sawrkar hmasa in school 180 upgrade (provincialise) tura a pawm tawh a awm a. Provincialise turah 2023 rules criteria hmanga tih tum a ni a, upgrade tura tling chu an upgrade mai dawn a, a pha lo awmchhun Special Blind School chu tumahin an thik an ring lo tih minister hian a sawi.