Zirtirtu lakah a theih ang angin a khaw mi la – Education minister

Tunhnaia state sawrkarin zirtirtu a lak tharah a theih ang angin a khawmite lak an ni tih School Education minister Lalchhandama Ralte chuan a sawi.
Mizoram chhim lam fanga chhuak School Education minister Lalchhandama Ralte hoin Thawhlehni khan Lai Autonomous District Council hotute nen Lawngtlaiah thutkhawm a ni a, LADC huamchhunga zirna kalpui dan tur an sawi ho.
Lawngtlai district huamchhunga zirna lama sawrkarin hmasawnna hna a thawhte minister hian a sawi a. Higher secondary school-ah science zirna pek belh turte, school building thenkhat sakthat leh thawmthat hna thawh a nih thu te sawiin, a theih ang angin sawrkarin zirna siamthat hna a thawk zel tih a sawi a ni. Tunhnaia zirtirtu lakah a theih ang angin a khawmite lak an ni, tiin, “Hei hian thingtlang lama an post-a awm tha duh lo a tih ziaawm theih beisei a ni,” a ti. LADC member-te chu zirna kawnga an thahnemngaihna lawmawm a tih thu a sawi bawk.
Lawngtlai district-a middle school 18, Mizoram sawrkarin a provincialise tawhte LADC kuta hlanlet leh dan tur sawi ho a ni a. LADC kuta hlanlet hi hmanhmawh theih a nih loh avangin fimkhur taka kalpui dan turte sawi a ni. Thutlukna siam hmain heng school-a thawk mekte hi state hnuaia awm nge an duh Council hnuaiah tih te thlan feltir an ni dawn a ni.