Zirtirtu pakhat chauh awmna school 81

Zirtirtu pakhat chauh awmna school 81
Mizoram sawrkar enkawl school zingah zirtirtu pakhat chuah enkawl school 81 a awm a, Lunglei district-ah a tam ber.
Record hnuhnung ber, UDISE+ (Unified District Information System for Education) 2023- 2024 a lan danin zirtirtu pakhat chauh nei school 81 hi district 9 – Aizawl, Champhai, Khawzawl, Kolasib, Lawngtlai, Lunglei, Mamit, Siaha leh Serchhip a ni a. Lunglei district-ah tam berin school 26 a ni.
Mamit district chu a tam ber dawttu niin school 20 a awm a; Aizawl district-ah 8, Lawngtlai district 7, Champhai district-ah 6, Siaha district 6, Kolasib district 4, Serchhip district 3 leh Khawzawl district 2 a ni. Saitual leh Hnahthial district-ah a awm ve lo thung.
Hetihlai hian Mizoram sawrkar enkawl high school 22 leh middle school 239-in headmaster nghet an nei lo a. A chhan ber nia School Education department-in a sawi chu, headmaster boral leh pension an awm zel vang a ni. Headmaster awm lohnaah hian contract-a rawih zirtirtu zingah headmaster charge la an awm lo tih sawi a ni.
Headmaster nei lo high school zingah Lawngtlai district an tam ber a, school 9-in neiloin, Champhai district-ah 6, Siaha district-ah 4, Saitual district-ah 2 leh Mamit district ah 1 a ni.
Middle school hi district leh sub division anga chhinchhiah a ni thung a. Aizawl district-a hi hmun (sub division) 4-a then niin Lunglei district ah pawh 2 a awm. Chutiang district dangah pawh a sub division hming anga kal a awm bawk. Champhai district/ sub division ah headmaster nei lo tam berin, school 30 an ni. Siaha 20, Lunglei North 19, Saitual 18, Khawzawl 17, Lunglei South 14, Hnahthial 14, Kolasib 14, Serchhip 11, Lawngtlai 10, Aizawl West 8, Darlawn 8, Kawrthah 8, Lungsen 8, Mamit 8, N Vanlaiphai 8, NGopa 8, Aizawl South 4, Kawnpui 4, Thenzawl 3, West Phaileng 3 leh Aizawl East 2 a ni.
School Education department chhinchhiah danin tunah hian zirtirtu atana lak ni si, office-a thawk (attach) 200 an awm mek a ni.