Zirtirtu pek vangin total bandh thulh

Zirtirtu pek vangin total bandh thulh
Lawngtlai district Lungtian khuaa sawrkar school-a thlaktu awm loa mathematics zirtirtu Aizawla sawn a nih avanga lungawilohna lantir mek a nih laiin sawrkarin zirtirtu a dah tawh a, lungawiloh lantir pawh tihtawp a ni.
Joint Coordination Committee Lungtian chuan an khua Govt Modern High School-a regular teacher sawnchhuah a nih avang leh, amah thlaktu mathematics regular teacher a awm tak mai loh avangin June 9 & 10 khan he school-a zirtirtu leh zirlaite kal tur chu an dang a ni.
Nilaini khan Lawngtlai atanga Education department aiawhte chu Lungtianah hian an kal a, an thutkhawm hnu ah Lunglei atangin mathematics regular teacher tur hi Lungtianah hian sawn tura tih a ni.
Sawrkar hian an thil phut a tih hlawhtlin loh chuan vawiin – June 12 atang hian Joint Coordination Committee huaihawtin Lungtian paltlang BRTF kawngpui chu tiamchin awm loa dan an tum thu an lo sawi tawh a, an thil phut a hlawhtlin tak avangin an thulh a ni.