Zirtirtu tan quarters sa dawn Lak ang ni loa thawk an tam – Chief minister

School Education department hnuaiah thingtlanga lama zirtirtu quarters sakna atan sum dah a ni tih chief minister Lalduhoma chuan a sawi a. Zirtirtu atana lak, zirtir hna thawk loa awm an tam avangin indaihlohna a nasat phah tih a sawi bawk. Assembly Budget Session-a School Education demand sawihonaah chief minister hian, zirtirtu tam tak, an post-a awm lo thin te chu an awm duh lo hrim hrim vang niloin, in luah tur an hmu zo lo thin tih a sawi a. Zirtirtu quarter sakna atan budget-ah cheng vaibelchhe 31.50 an dah a. Hei hian engemawzat chu a chhawk dawnin an hria tih a sawi.
Chutihrualin heng quarters satu turte hian an sakna school headmaster/ principal in completion certificate a sign loh chuan bill pek an ni dawn lo, tiin, “Bill pek tlak a ni lo an tih chu kan pe dawn lo,” a ti.
Education leh health bikah hnaruak hnawhkhah loh tam lutuk chu sawrkar buaina a ni tiin, “Zirtirtu atana lak ni si zirtir hna thawk lo an tam. Doctor-ah pawh hei hi a ni. Doctor hna thawk loa office-a awm an tam lutuk. Kan indaih lo kan ti leh si a, hei hi kan enfel ang. Zirtirtu tura lak chuan an zirtir tur a ni, doctor chuan doctor hna thawk rawh se, office ah ni loin,” Lalduhoma hian a ti.
Transfer & posting-ah sawrkar a buai a, zirtirtu semrual tum pawh a hlawhtling hleithei thin lo, tiin, thingtlang kilkhawr, mite an awm duh lohna, transfer dan ngawt ngaihtuaha an phet leh sek na tur hmun ang bikah chuan, an service chhunga thawk duh tur dah tawp a, ‘non transferable post’ siam a ngai nia an hriat thu a sawi.
ZPM-in Education Policy a nei a, PPP method-a kal an ngaipawimawh tih chief minister hian a sawi. English medium school leh kohhran school te, administration leh management tha zawk daih, transfer & posting-a harsatna nei ve lo, Board leh Management Committee-in a ngaihtuah, zirtirtu an lak pawha an fate zirtirtu tura uluk taka an lak, transfer awm ve lo, mitha lo an ban mai theih ho management chu sawrkarin a pha lo a, heng ho hi rinchhan ve an duh tih a sawi.
“English medium school leh kohhran school-te an awm dan pangngaiin financial support pek kan duh a. Chutihrualin sawrkar school kan hlamchhiah dawn loa, theihtawpin tih that kan tum dawn tho,” a ti.
English medium school leh kohhran school fee chu tihhniam an duh a, mi harsa deuh tan pawh kawng a inhawn ve theih nan sawrkarin suma a tanpui na na na chuan fee chi hrang hrang pawh tihniam turin an beisei dawn tih a sawi a ni