Zirtirtu zirtir dan tur rel

District AIDS Prevention and Control Committee Lunglei chu an chairman, bawrhsap Navneet Mann hoin nimin khan an thukhawm a. MSACS leh School Education department thawhdunnaa private middle school, high school leh higher secondary zirlaite zinga HIV/AIDS darh tur leh ruihhlo hmansual venna tura Adolescent Education Programme (AEP) ruahman hnuaiah Lunglei district leh Hnahthial district-a zirtirtu training thawh hnihna buatsaih tum an sawi ho.
AEP hnuaiah hian private school zirtirtu pahnih (mipa & hmeichhia) thlante chu training pek niin, an ni hian an zirlaite hnenah HIV/AIDS leh ruihhlo laka an fihlim theihnan hma la a, zirtir chhawng tura beisei an ni. 2024 March khan Lunglei district-a private school 33-a zirtirtu 66 chu training pek an ni a. 2nd batch atan hian 1st batch-a tel lo, private school la bak zawng, Lunglei district-a school 23 leh Hnahthial district-a school 14, a vaiin 37-a zirtirtu 74 chu training pek leh tur a ni a. March 4-6 chhungin buatsaih tum a ni.