Sawhthing dahna tur buara bag sem dawn

Sawhthing dahna tur
buara bag sem dawn
District Agriculture Marketing Committee (DAMC) Hnahthial chuan an huamchhunga Collection Centre tinah sawhthing dahna tur buara bag an semchhuak dawn.
DAMC Hnahthial hi an chairman, bawrhsap Rita Lalnunmawii Pachuau kaihhruaiin Ningani khan an thukhawm a. Hnahthial district-a sawhthing lei dan tur a kaihhnawih thil pawimawh dang an ngaihtuah. Secondary Collection Centre hrang hrang vil tur an inruat a. Centre tinah sawhthing dahna tur buara bag 1000 theuhin sem nise, an ti.
Hnahthial Secondary Collection Centre-a awm, South Lungleng chu Darzo Secondary Collection Centre-ah dah a ni a. Karleh Thawhlehni hian an district -a Collection Centre-a manager leh accountant-te tan an hriat tur tul inhrilh tum a ni.
Chairman chuan sawrkarin kuthnathawkte sawhthing thar chhuah a leisak dawn avangin hemi atan hian District Agriculture Marketing Committee pawh theihtawp chhuaha inbuatsaih a tul tih a sawi a. Mizoram Agricultural Marketing Board coordinator Dr Malsawmdawngliana pawhin a hmasa ber atan Hnahthial district-ah sawhthing quintal 5250 lei a ni dawn tih a sawi a ni.