Zirtirtute chibai ka buk – CM

September 5 – Zirtirtute Ni ah chief minister Zoramthanga chuan zirtir hna thawk mek leh chawl tawhte zahna chibai a buk.
Zirtirtu Ni vawi 61-na denchhena thuchah a siamah chief minister chuan zirtirtute chu ram leh hnam rohlu, lehkha zirthiamna bakah mihring puitling chherchhuahna hna thawktu ropui tak an ni, tiin, an pawimawhna leh hlutna, an mawhphurhna sang tak chu ram mipuiin kan hriatsak reng a pawimawh tih a sawi.
“Khawvela mi ropui leh mithiamte hi zirtirtu kutchhuak an ni a, zirtirtu hna chu hna zahawm chungchuang, an lo ti hial thin. Zirtirtu hna chu hna zahawm chungchuang tak a nih zel theih nan zirtirtute pawhin mawhphurhna kan nei a, zirlaite leh ram mipui pawhin hna zahawm thawktute zah leh chawimawi hi kan tih tur a ni tih hre thar ang u,” a ti.
National Award to Teachers 2023 dawng tur, India rama zirtirtu tha thlanchhuah 50 zingah Govt Diakkawn High School zirtirtu Lalthianghlima a tel chu a lawmpui tih chief minister hian a sawi bawk.
Thawhlehnia Mt Carmel School-in Zirtirtu Ni puala programme Aizawl Lammuala an buatsaih chu chief minister hian a hmanpui a. Naupan lai atanga min kaihruaitu zirtirtute chu kum a lo veiin an hlutzia kan hrechhuak belh zel thin, tiin, zirtirtute pawh ram nghahfak naupang leh thalaite an kaihhruianaah theihtawp chhuah zel turin a chah.
India vice president hmasa ber, president pahnihna ni bawk, zirtirtu ropui tak tia hriat Dr Sarvepalli Radhakrishnan piancham, September 5 hi kum 1962 atang khan ‘Zirtirtute Ni’ atan ram pumah hman a ni.