ZMC-a thawktute state sawrkar hnuaia lak an rel

Zoram Medical College-a thawktute chu Mizoram sawrkar hnuaia lakluh ve tha tih a ni a, council of minister ngaihtuah atan dah a ni.
Thawhtanni khan chief minister Lalduhoma hoin Zoram Medical College (ZMC) tihhmasawn zel dan tur rel a ni a. Health minister Lalrinpuii, ZMC hotute bakah Finance, DP&AR, Health & Family Welfare leh Law & Judicial department hotute an tel.
Chief minister chuan tunhnaia ruah leh thlipui vanga ZMC-in harsatna a tawk chu pawi a tih thu a sawi a. Engkim tluang taka a kal leh thuai theih nan theihtawp a lo chhuahpui thu leh vawiin thlenga a ngaihven zui reng thu a sawi a. ZMC thawktute pawhin Disaster Management & Rehabilitation department leh department dangten ZMC harsatna tawh an umzui tha hle tih chief minister hi an hrilh.
Thutkhawmah hian ZMC kalphung thil pawimawh sawi a ni a. National Medical Council endikna an hmachhawn mek a, online inspection leh CCTV inspection a kal mek thute sawi a ni. ZMC behchhan helipad leh Fire Station siam thuai a tul thu pawh sawi a ni.
ZMC-a thawktu, society hnuaia lakte leh Mizoram sawrkar hnuaia lakte felfai zawka enkawl dan tur sawi a ni a. Kum 2019-a a zirchiangtu Committee-in report a lo siam tawhte sawi niin, ZMC thawktute hi Mizoram sawrkar hnuaia lakluh vek thain thutkhawm hian a hria a. Council of minister thuneihna a nih avangin an ni ngaihtuah tura thlen ni se, tiin an rel.