ZMC batch hmasa ber result chhuak Zirlai 68 an pass; pass %age 71.57

ZMC batch hmasa ber result chhuak
Zirlai 68 an pass; pass %age 71.57
Zoram Medical College-a MBBS (Bachelor of Medicine and Bachelor of Surgery) zirlai hmasa ber, 2018 batch result chu Thawhlehni khan tihchhuah a ni a. Zirlai 95 exam zingah mi 68 ten hlawhtlinna changin, pass percentage hi zaa 71.57 a ni a, Lalrempuii Hmar chu pakhatna a ni.
ZMC-a batch hmasa ber, kum 2018-a tanah hian seat 100 a awm a, thihna leh chhan dang vangin mi 95 an exam thei a, an zinga 27 erawh subject thenkhatah an fail a, an hlawhtling tluantling zo ta rih lo. Pakhatna Lalrempuii Hmar hian Obs & Gynae leh Paediatrics ah a honours a ni. 2-na F Vanlalchuanpuia niin, 3-na Ruth Lalrinawmi a ni a, top 3 hi Mizoram atanga lut zirlaiten an hauh vek a ni.
Health & Family Welfare minister Dr R Lalthangliana chuan thuchah siamin, Zoram Medical College-in chanchin lawmawm tak a nei chu Mizoram tan mellung pawimawh tak a ni tih a sawi a. Sawrkar hmasain theihtawp chhuaha bul a lo tan tawhnaah lawmthu sawiin, Medical College puitlinna’n tun sawrkar pawhin theihtawp a chhuah tih a sawi a ni.
Covid-19 hrilen laiin ZMC chu Dedicated Covid Hospital-a puan niin, hei vang hian MBBS zirlaite pawhin harsatna tam tak an tawk tih minister hian a sawi a. Harsatna tam tak kara hlawhtlinna chang zirlaite chu a lawmpui thu sawiin, tun tuma hlawhtling ta lo te tan Mizoram University-in exam a buatsaih leh thuai tur thu a sawi bawk.
MBBS zirchhuak thar ten internship an tan thuai theihna’n sawkarin hma a la mek tih sawiin, “National Medical Council nen indawrna kalpui mek a ni a. MBBS zirchhuak thar an awm avang hian nakum lamah chuan doctor indaihlohna pawh engemawchenah a phuhruk ngei beisei a ni,” a ti.