ZMC ‘ELIXIR 2023’ khar

Zoram Medical College (ZMC) College Week kharna leh Cultural Day ‘ELIXIR 2023’ chu Zirtawpni khan khar a ni.
He hun hmanpuitu I&PR minister Lalruatkima chuan zirna bakah taksa leh rilru hriselna lam hawi program an buatsaih chu fakawm a tih thu a sawi a. Zoram Medical College puitlin theih nan leh tun dinhmun a thlen theih nana theihtawp chhuahtu leh sulsutute fakawm a tih thu a sawi bawk. Doctor-te rawngbawlna chu ropui a tih thu a sawi a. An lakah beiseina sang tak mipuiin an neih thu a sawi.
ZMC zirlaite chu nakin zelah pawh hnam ziarang leh nunphung zahpui loa chhawmnung zel turin a chah a. Nu leh pa, aia upa leh zirtirtute chawimawia zah fo turin a fuih. Thiamna tak tak nei tura theihtawp chhuaha lehkha zir tur te, degree neih maia lungawi loa, rawn tlak leh inghahna tlak nih tum turin a fuih a. Doctor mamawhna leh indaihlohna awmte phuhru theia ngaihtuahna seng turin a chah.
ZMC director Dr John Zohmingthanga chuan ZMC thuamthat leh tihchangtlun kawnga sawrkarin theihtawp a chhuah thin chu lawmawm a tih thu a sawi a. ZMC zirlaite, a bikin state pawn atanga lokalte lawmna thu sawiin, theihtawp chhuaha lehkha zir turin a fuih.