ZMC-SRHF Poor Fund-ah hlan

ZMC-SRHF Poor Fund-ah hlan
Chhimphei Focus chuan Thawhlehni khan Zoram Medical College / State Referral Hospital Falkawn Poor Fund-ah damlo harsate tanpuina atan concert an buatsaih atanga sum an hmuh an hlan.
Chhimphei Focus hian ZMC/SRHF-a damlo harsate puihna atan Poor Fund-a chhunluh turin kumin March 31 khan Sateekah concert an buatsaih a, chuta an sum hmuh Rs. 35750 chu a bo a bâng awm loin Poor Fund-ah an chhunglut a ni.
Chhimphei Focus president T Zoliana chuan, an pawl din chhan chu chhimphei (Hualngohmun leh Sailam inkar) huamchhunga puih ngaite tan engemaw kawng tala malsawmna ni tura hma lak a ni tih a sawi a. “Hmalakna hmasa atan ZMC-a awm damlo harsa zual tan hma kan la a ni,” a ti.
Chhimphei huamchhunga khuate chu lui pathum – Tlawng, Tuirial leh Tuirivang lui hnara awm an nih thu sawiin, “Tuihna humhalh, ramngaw leh nungcha humhalh, faina leh thianghlimna lama hma lakte kan tum a, kan pawl hi political party-a inhnamhnawihna nei lo pawl a ni,” a ti.
ZMC director Dr John Zohmingthanga chuan an damdawi ina damlo awm zinga khawsak harsate puihna tura Chhimphei Focus-in sum thahnem tak an pe chu an lawm takzet tih a sawi a ni.