ZMC&H atangin MBBS zir 96-in an zir zo MBBS zingah inremna bawhchhia awm – Health minister

Mizoram quota-a medical doctor zirchhuak zingah sawrkar nen thutiam an lo neih tawh bawhchhe thin an awm tih Health minister Lalrinpuii chuan a sawi a. Thutiam an ziah chu tih puitlin tum turin zirchhuak tharte a chah.
Zoram Medical College & Hospital (ZMC&H) a kum 2020 batch MBBS zirchhuak tharte chu Thawhlehni khan thlah an ni a. Hmanpuitu Health & Family Welfare minister chuan, graduate tharte chu Covid len laia zir tan ni mah se, tha taka an pass theih avangin a lawmpui tih a sawi a. Doctor indaihlohna engemaw chen a phuhruk a ring tih a sawi.
Mizoram sawrkarin quota a neih hmangin MBBS an zir theihnan theihtawp a chhuahpui a, zirtirtu tha tak tak a rawih bakah fee pawh a tum sak laiin, an zir tan dawna Mizoram sawrkar hnuaia thawk tura thutiam an ziah bawhchhe thin an awm tih a sawi a. Tun tuma ZMC&H atanga zirchhuakte chu an thiamna ramin a mamawh huna tlanchhe loa, thutiam an ziah chu puitlin vek turin a ngen tih a sawi.
Zirlaite hian an zir zawh hnuah kum hnih chhung Mizoram sawrkar hnuaia thawk turin inremna hi an zir hmain an lo ziak tawh tih a sawi a ni.
Hmanpuitu dang adviser to CM (Finance) TBC Lalvenchhunga chuan, doctor hna chu Mizo tlawmngaihna nena inzawm tlat a ni tih a sawi a. Mipui hmachhawntu, damlo te tana damna an nih avangin damlote damna tur an hre nghal lo a nih pawhin, an tan beiseina siam thiam turin a chah.
Graduate tharte hi batch thumna niin, 2021 February atangin zirna bul an tan a, final exam pe zirlai 98 zinga 96 graduate theiin pass percentage chu 97.95 a ni. Zirlai titha bik hnenah lawmman sem a ni a, Alex Vanlalruatkima, C Lalhmachhuani leh Zosangpuii te chu pakhatna, pahnihna leh pathumna an ni. Col VL Ruata Award pawh sem niin, zirna piah lama activity hrang hranga titha Paul Ngurthantluanga Vanchhawng hlan a ni.
2018 August 7-a ZMC&H din a nih hnu ah 2025 atangin post graduate (PG) zirna tan a ni tawh a. Department 5 – anaesthesiology, general medicine, general surgery, obstetrics & gynecology leh pediatrics-ah seat pahnih theuh hawn ni tawhin zirlai 9 an nei a. Master of Public Health zir mek 8 an awm bawk.