Zo hnahthlakte’n kuang nen kawng an zawh

Thawhlehni khan Lamka khawpuiah Zo hnahthlakte’n kuang nen kawng an zawh a, mipui an hnahnem hle.
November ni 11-a Jiribam district-a CRPF te’n Zo hnahthlak volunteer mi 10 an kahhlumrte sun nan leh CRPF laka lungawi lohna lantirin kuang nena kawngzawh hi an huaihawt a ni.
Lamka atanga thu dawn danin, kawngzawhah hian mi an thahnem a, hmeichhia phei chu mittui tlate pawh an awm. Nunna chan tate chhungte an kal tha tih thu dawn a ni.
Lamka Football Ground atangin Peace Ground thlengin kawng hi an zawh a, km 4 vel a ni. Peace Ground hi Manipur-a Zo hnahthlakte leh Meitei an intihbuainaa Zo hnahthlak nunna chante an phumna hmun a ni.
Football Ground hi hmun hrang hrang atangin volunteer te’n kuang zawn chungin an pan a, Football Ground-ah innghakkhawmin, a huhovin Peace Ground hi an pan a ni.
Nunna chan ta mi 10-te hi volunteer vek an ni a, November ni 7-a Meitei-in rawng taka Zosangkim Hmar an thahna vela an kal, an haw leh lam CRPF te’n an lo kaphlum a ni. Hei vang hian volunteer te’n neitu chan an chang deuh a, kuang nena kawngzawh pawh hi a tira rawttu tak chu hmun hrang hranga volunteer-te an ni tih thu dawn a ni.
Kuang nena kawngzawhah hian kuang tak tak ni lo an zawn a, volunteer-te’n uniform hain zah takin an zawn a ni.
Nunna chante ruang hi Lamka-a District Hospital-ah a la awm a, post mortem report an hmuh hma chu vui loh an tum. Damdawi in kawtah thalaiin an awm chilh a, zan lamah pawh an tlaivarpui thin. Vui hma chu tlaivarpui an tum.