Zo hnahthlakte’n sorkar thar tur ‘welcome’ rih lo

India sorkarin Manipur-ah sorkar thar din a tum mek a, chief minister atana an thlan pawh a chiang tawh. Chutih laiin Manipur-a Zo hnahthlakte’n sorkar thar tur hi an lo lawm rih lo a, thil kal dan erawh a inthlak thei.
Manipur-ah hian BJP an sorkar thin a, May ni 3, 2023 atanga Zo hnahthlakte leh Meitei an intihbuai hnuah President’s Rule puan a ni. President’s Rule hi February ni 15-a tawp tur a ni a, India sorkarin President’s Rule puan chhunzawm lova sorkar thar din a tum a ni.
BJP party chhungkuaah sorkar thar din tum chungchang hi tun hnaiah an ngaihtuah a, Delhi-ah te, Guwahati-ah te Delhi-a BJP hruaitute leh Manipur-a BJP hruaitute an indawr thin. February ni 3-ah khan sorkar thar tur ruangam a lang tan a, chief minister tur a chian bakah Zo hnahthlak MLA Nemcha Kipgen, Kangpokpi MLA chu deputy chief minister a ni ang tih hriat a ni. A tukah Zosanglura, Tipaimuk bialtu leh Churachandpur bialtu LM Khaute te cabinet minister an ni ang tih thawm a ri leh.
Manipur atanga thu dawn danin, BJP chhungkuain sorkar thar din an tum tirh atangin Zo hnahthlak mipui lamah a duh lo thawm a ring a, hetia a ruangam tur engemaw chen a lan hnuah hian thawm a ring zual.
BJP chhungkua an indawr laiin Zo Kuki Council chuan sorkar thar din tumna hi an pawm loh thu an lo sawi tawh a, hetia a ruangam tur a lan ruak hnuah erawh Zo hnahthlakte intelkhawmna pawl hrang hrang, Zo United te, Indegenous Tribal Leaders’ Forum te, Zo Kuki Council te’n Nilaini tlai lam thleng kha chuan thawm an nei lo.
Mipui lamah erawh a duh lo thawm a ring a, January ni 14-a Kuki Zo Council leh Indegenous Tribal Leaders’ Forum huaihawta Churachandpur-a mipuiin kawng an zawh pawhin an auhla chu Meitei-te nena rorelna pakhat hnuaia awm theia an inngaih tawh loh thu leh an duh chu UT a nih thu a la ni.
February ni 3-ah BJP hruaitute an thu a, sorkar thar ruangam tur engemaw chen a lan hnuah Manipur-ah venhim hna a khauh nghal. Churachandpur-ah pawh khawlaiah sipai an duty a, hmun hrang hranga Zo hnahthlak MLA-te in pawh ngawrh takin an veng tih thu dawn a ni.
Manipur-ah hian Zo hnahthlak MLA 10 an awm mek a, panga chu BJP niin, Kuki People’s Alliance pahnih, Kuki National Assembly pahnih leh JD-U pakhat an awm.