Zofa Global Convention hmang

Zofa Global Convention hmang
Khawvel puma Zofate insuihkhawmna tura hma latu pawl, Zofa Global Network (ZGN) chuan Nilaini khan Aizawlah ‘Zofa Global Convention’ an hmang.
ZGN Chapter hrang hrang – Manipur, Shillong leh Champhai atangin palai engemawzat an tel a. Mizorama NGO hrang hrang leh hnam pual zirlai pawl aiawh an tel a. Pawl aiawh leh Chapter hrang hrangten thu an sawi a ni.
Convention hmanpuitu adviser to chief minister Lalmuanpuia Punte, MLA chuan thu belhchian dawl lo hmanga raltlan beihna a nasa tih sawiin, “Zirchiannaah Mizorama thilsual khawihtu zingah raltlan pawh ni kher loin, Myanmar mi hrim hrim zaa 5 chauh an awm. Buaina thleng a awmin fimkhur taka thuchiang hriat kan tum a ngai. Hetianga raltlante puhna hian Zofate inpumkhatna atan harsatna a siam nasa hle,” a ti.
ZGN pawhin inpumkhatna tichak turin culture hmanga hma an lak zel chu a hlawk em em tih a sawi a ni.
Zofa Global Convention hi ZGN khawmpuilian leh rorelna sang ber a ni a. Resolution pahnih pass in – Zofa hnam hrang hrang zingah unau hmelhai a awm leh thin hi a pawi kan ti a. Khawvel mithmuha hnam anga kan dinchhuah theihnan Zofa hnam hrang hrang inngeih dial dialin, thukhat vua-in insuihkhawm ang u tih leh; social media-a unau leh unau rilru tina thei thuziak leh thusawi lakah fimkhur tlang turin Zofa zawng zawng kan ngen a ni, tih a ni.