Zofate ni pawimawh February ni 20

February ni 20 kha Mizoram tan State Day a ni a, Myanmar-a Zo hnahthlakte tan chuan Chin National Day a ni. He ni vek hi Zomi Nam Ni pawh a ni a, hmun hrang hranga Zo hnahthlakte tan he ni hi ni pawimawh a ni.
Myanmar-ah chuan Zofate hi ‘Chin’ tia koh an ni a, February ni 20 hi kum tinin Chin National Day tiin an hmang thin.
1948 February ni 20-ah khan Chin mipui hruaitu pawimawhte an inhmukhawm a, an hmakhuate ngaihtuahin an dikna chanvo (right) humhim a nih theih dan tur an ngaihtuah a ni. Chumi ni chu an dikna chanvo humhalhna ni-ah an chhiar ta a, 1951 February ni 20-ah Mindat khuaah a vawi khat nan Chin National Day an hmang ta a ni.
Kum dangah pawh an hmang ta zel a, an ngai pawimawhin an hmang urhsun deuh deuh bawk. Sorkar hriatpuia hmang erawh an ni lo a, mipui tangrualin an hmang tawp mai a ni. 2010 vel atang khan Myanmar-a sipai sorkar an dul ta deuh a, sorkar hriatpuiin he ni hi an hmang ta. Mahse 2021-ah sipaiin thuneihna an pawng lak leh a, Chin National Day hi a hma angin an hmang mumal thei ta lo.
Myanmar-ah sipai leh mipui thlante’n ro an rel a, mahse 2021 February ni 1-ah sipaiin thuneihna an pum hmawm leh. Chuti chung chuan hmun hrang hrangah he ni hi an hmang thin. Mizoramah pawh an hmang thin a, kuminah pawh an hmang.
Chin National Day hi Zomi Nam Ni tia hmang an awm bawk a, Myanmar-ah leh Manipur-a Zo hnahthlakte zingah Zomi Nam Ni hi an hmang thin. Aizawlah pawh Zomi Nam Ni hi an hmang thin a, kuminah pawh Zomi Cultural Society te’n he ni hi an hmang.
Mizoram tan chuan State Day a ni a, 1966 atanga zalenna sualtu MNF leh India sorkar an inrem hnuah 1986 February ni 20-ah Mizoram UT atangin state-ah dah a ni. Mizoram tan ni pawimawh a ni a, sorkar chawlh a ni.
State Day a nih bakah 2025 atangin State Day of Prayer a ni ta a, hemi atan hian sorkarin committee a din a ni. Kuminah pawh he ni hi hman leh a ni.