Zofate tam administration hran sualchhuah a tul – Lalduhoma

Zofate tam administration hran
sualchhuah a tul – Lalduhoma
Manipur-a Meitei leh Zofate inkara buaina awm mek chu ruahman lawk a nih avangin President Rule-a dah turin sawrkar laipui an phut a; Manipur-a Zofate tan administration hran kan sualchhuak ngei ngei turah a ngai tih ZPM MLA Lalduhoma chuan a sawi.
ZPM leader hian thuchah a siam a. Kum 2015 atanga Meitei rorelna Manipur sawrkarin tlangmite hamthatna leh an chenna ram lak sak tuma a beih dan leh, State Assembly-a tum nei nia ngaih leh pass loh theih loha bill an pass chhoh dan te a sawi. Manipur sawrkarin dan thar siam hi Zohnahthlakte hian kum 2015 khan duh lohna an lantir a, mi 9-in nunna an chan phah tih a sawi bawk.
Tuna buaina pawh Meitei hoin tlangmite ram chhuhsak tuma hma an lakna kal zel a ni, tiin, “He buaina hi Meitei ho leh Zofate inbeihna a ni ringawt loa, Manipur sawrkar leh Zofate inbeihna a ni. Manipur sawrkar hian an Police Commando-te chu silai nen hma hruai tirin, an hnungah mipuiin an zui thin. Sawrkar chu buaina chingfel tura ban phar tur a nih laiin, ualau taka tan lam tilangin, inbeihnaah a hmatawngah a tang zawk a. Buaina a chhuah hma hian Manipur sawrkar chuan civil mite silai a tuntir hmasa vek a. Hei hian ruahman lawk a nih zia a tichiang hle a, a rang thei ang bera President Rule-a dah turin sawrkar laipui kan phut a ni,” Lalduhoma hian a ti.
Mizoram sawrkarin a theih ang anga hma a la chu lawmawm an tih thu leh a theih ang anga tawiawm zel an tum thu a sawi a. Hnam thil a nih avangin party bil hamthatna zawng lo turin party tinte pawh a ngen tih a sawi.
Kum 2015 a buaina a chhuah tum khan Zofate inkarah inunauna leh pumkhatna a piang nghal mai a, tun tumah pawh chu chu a ni leh tho tih sawiin, Meitei hote pawhin unau kan ni tih hi an hai loa, chibing te tea min bei loin, min vaihma vek tih a sawi a ni.
“He buaina phenah hian hnama min dintu Pathian hian thil tum a nei ngei ang. Meitei hote nen hian rorelna pakhat hnuaia awm zui chi kan ni tawh lo. Separate administration kan sualchhuak ngei ngei tur a ni. He buaina hi unau kan nih min hriat thar tir leh tu, pumkhatna min petu, hnam anga kan dinchhuahna tur hmanrua leh malsawmna inthup lo ni mawlh rawh se,” ZPM leader hian a ti.