Zofate thlang tlak dan chhui

Zofate thlang tlak dan chhui
Art & Culture department leh Mizo Academy of Letters (MAL) tangdun buatsaih ‘Thu leh Hla Kutpui’ chu Govt. Champhai College-ah Thawhlehni khan neih a ni.
Kut hmanpuitu Art & Culture minister C Lalsawivunga chuan Mizoten kan history kan ngaihpawimawh thar a, history dik nei tura tan kan lak a tul tih a sawi a. Tuna ke kan pen loh chuan thang lo thar zela kan thlahte kan history hriatna kawngah an dal anga, hawi lam tur bik hre loin an darh nuai mai ang tih a hlauhawm, tiin, tun hi tan lak hun a ni a, Art & Culture department chuan theihtawpin hma a la tih a sawi a ni.
“Kan historian hmasaten thahnemngai takin bul lo tan tawh mah se, sawrkar angin ‘hei hi a dik chu a ni e’ tia pawm kan la nei lo a, kan zavaia kan pawm tlan theih tur history kan neih theihnan hma kan la a ni,” a ti.
Champhaia Thu leh Hla Kutpui neihah hian “Zofate thlang tlak dan zirchianna” tih chu thupuiah hman a ni a. “Zofate thlang tlak dan – Lungphun hmanga zirchianna” tih thupui hmangin Prof. Malsawmliana’n a sawizau a; “Zofate thlang tlak chhan leh an thlang tlakna kawng” tih thupui hmangin Dr Malsawmdawngliana’n a sawizau bawk. Heng thupui pahnih hi sawiho zui a ni.