Zokhawsang rama thu inhmu lohnaah insiamrem
Zemabawk Zokhawsanga Assam Rifles awmna paltlang ngaia lo leh quarry neite kaltlang phal an nih loh chungchangah thu inhmu lo a awm a, kawng dan hial a ni. Sawrkar hotute nen sawiho a nih hnu ah insiamrem a ni.
Zokhawsanga Assam Rifles ram paltlang ngaia lo nei, Khuanghkhau lui Zau Association, Zokhawsang Farmer Society leh kuthnathawktu intelkhawm chuan AR awm hnu hian an awmna paltlang ngai an huan lo ram pan turin duh hun hunah an kaltlang thei tawh loa, hemi paltlang ngai loa state sawrkarin vantlang kawng a siamsak chu hman hleihtheih ala nih loh laiin, state sawrkar hian hman theih tawh angin AR leh sawrkar laipui lamah a lo report tawh nia an hriat thu te sawiin, hengte avang hian lungawilohna lantirin July 10 atang khan AR hmun panna kawng hi dan an tum tih an sawi a ni.
Kuthnathawktute hi excavator nena chhuakin, an thil phut ang hi remtihsak an nih loh chuan Assam Rifles awmna hmun panna hi laihchhiat mai an hnial loh tur thu an sawi.
Home secretary hoin a kaihhnawih state sawrkar department leh Assam Rifles bakah hemi huamtu Zemabawk Local Council hruaitute leh loneitute hian an sawi ho a ni.
Home secretary chuan loneitute hnenah thil kalphung leh nih dan leh Home department-in AR insawnna tur chungchanga hma a lak dante a sawi a. Loneitute atangin harsatna an tawh hrang hrang ngaihthlak a ni a. Sawiho a nih hnuah inremna thuthlung siam a ni.
Inremna thu:
# Zokhawsang leh a chhehvela loneituten thu an hriatfiah tawk loh avanga Mizoram sawrkar leh Home department an puhna bakah Assam Rifles chungah thupha an chawi.
# By pass road siamthat a nih hma chuan loneituten Assam Rifles Bn. Hqrs Zokhawsang kaltlangin Thawhtanni, Thawhlehni, Ningani leh Zirtawpni ah te lirthei nen zing dar 4.00 atanga tlai dar 6.00 inkarah an kaltlang thei anga, Nilaini leh Inrinni ah hian lirtheia kaltlang a rem dawn lo thung. Ke erawh chuan engtik niah pawh kaltlang theih a ni ang. He remruatna hi security thil leh tul bik thilah Assam Rifles leh Home department-in an ennawn thin ang.
# By pass road hi a rang thei ang bera siamthat a nih theihna’n state PWD chu hma la nghal tura tih a ni.
# Loneitute lungawilohna lantir tum chu July 10 atang hian thulh nghal a ni.