Zoonoses Day hmang

July 6 kha World Zoonoses Day a ni a, Aizawlah chuan Centre for One-Health, AH&Vety department bultumin Veterinary Polyclinic Hospital Khatlaah hman a ni.
AH & Vety additional director (VS & PH) Dr R Zothanmawii chuan ran enkawl danah kan fimkhur a ngai a, kan rante an hrisel loh chuan an hnen atangin natna chi hrang hrang kan kai thei a, ran kan enkawlte thianghlim a, uluk leh fimkhur taka enkawl a pawimawh tih hriatrenga a ngai tih a sawi. Chutiang tur chuan a hun takah a hri venna pek a ngai tih a sawi bawk.
Kumin World Zoonoses Day thupui chu – ‘ran atanga hri inkaichhawn theihte khuahkhirh leh umbo tura tanrual’ tih a ni a. 1885 July 6 khan France ramah Louis Pasteur chuan a vawikhatna atan naupangah anti-rabies vaccine a pe a, he Ni denchhen hian World Zoonoses Day hi hman a ni.
He ni pual hian ‘Free Anti-Rabies Vaccination camp’ hman nghal a ni a. Ui leh zawhte engemawzat anti rabies vaccine a thlawna pek an ni. Anti-rabies vaccine hi World Health Consortium tanpuina atanga pekchhuah a ni.