Zoram mipuiin MUHCS kan chhawr tlan thuai ka beisei – K Sapdanga
Zoram mipuiin MUHCS kan
chhawr tlan thuai ka beisei
– K Sapdanga
Mizoram Universal Health Care Scheme (MUHCS) chu Mizoram mipuiin buaina awm loa kan chhawr tlan theih thuai a beisei tih Home minister K Sapdanga chuan a sawi.
Inrinnia Lunglei Serkawn-a Christian Hospital a tlawhnaah Mizoram sawrkarin damloh nikhuaa mipuiin inenkawlna tha an dawn theihnan Mizoram Universal Health Care Scheme (MUHCS) a duang a, siamrem leh ennawn ngaite zir chiang tura Review Committee dinah chairman-a ruat a nih angin, damdawi in chu tlawh a ni tih a sawi a. Christian Hospital chu MUHCS timawitu leh tiphuisuitu hmasa ber, phur tak leh inhawng taka sawrkar thawhpuitu a nih angin an ngaihlu takzet a, BCM leh damdawi in leh thawktute chungah sawrkarin MUHCS kaltlangin lawmthu a sawi tih a sawi a ni. MUHCS chu Mizoram mipuiin buaina awm loa kan chhawr tlan theih thuai a beisei tih a sawi bawk.
Christian Hospital Serkawn hotute chuan MUHCS hnuaia an damdawi in bill neih chu sawrkarin rei rial loin chawlhkar tin a pe chhuak zung zung a, pawisa an dawng tha tih sawiin, sawrkar chungah an lawm hle tih an sawi a ni.
Christian Hospital Serkawn hian kumin May 21 khan MUHCS hi hmang tanin, damlo 786 inenkawlna senso cheng nuai 151.75 chu Mizoram sawrkar atangin an hmu let tawh a. Kartin chawh rualin cheng nuai 13.2 vel hmu ang an ni.
UD&PA department kaltlanga Christian Hospital Serkawn-a damlo awmpuitute riahna tur ‘Patient Attendants Shelter’ mipa 5 leh hmeichhe 5 thlen theihna sa tura ruahman chu buaipui mek a nih thu leh fur zawh veleh hna tan theih beisei a nih thu sawi a ni.
Minister hian Mizoram Presbyterian Kohhran enkawl John Williams Hospital a tlawh bawk a. Damdawi in enkawl chu rawngbawlna pawimawh tak a ni, tiin, sawrkar hmalakna hrang hrangah kohhran leh mimal damdawi inten sawrkar an thlawpin an thawhpui tha tih a sawi a. John Williams Hospital-a thawktute chu tha taka sawrkar thawhpui zel tur leh mipui hriselna atan theihtawp chhuah chhunzawm turin a chah.
Hetihlai hian DP&AR minister ni bawk K Sapdanga hian Lungleia sawrkar department hotute nen an inkawmnaah sawrkar hnathawk ruihtheihthil vang emaw hrisel lohna vang emawa chhawr tlak loh an awm chuan sawrkarin hma lak zel a tum tih a sawi a. Pension pangngai emaw special retirement scheme emaw hmanga chawlhtir an nih theihnan department hotuten khauh taka hma la zel turin a chah. Home department hnuaiah ruihhlo vanga buaina tiziaawm turin September atangin ramri atanga ruihhlo lo lut tiping tura beihpui thlak tum a ni, tiin, ruihhlo ngaite leh zuarte enzui kawngah pawh khauh zawka hma lak tum a ni tih a sawi a ni.