By Mahmuaka Chhakchhuak
-- Advertisement --
Oct. 27th, 2006-ah khan Kulikawn khawtlangin Kulikawn Pasalthate Chawimawina hun an hmang a, chutah chuan Monument ropui tak an siam bawk a. Chu Monument-ah chuan heti hian ziak a ni;
NGHILHLOH NAN
Zofate zalenna tura kum 1926-a Jail tang, Hnam meichher chhitu
Hruaitu Arsite
Lest We Forget
Political Torch Bearers of Mizo
Telela 1888 – 1966
Thuama 1888 – 1960
Liansiama 1888 – 1968
V.Z. Biaka 1891 – 1952
Chawnghnuaia 1890 – 1962
Thanzuala 1890 – 1930
V. Ch. Saikunga 1895 – 1950
Heta Pasaltha hming tarlan zinga a hmasa ber Telela hi a chanchin kan han sawi tur ber chu a ni a, hetianga chawimawi tlak a nihnate hi thangthar tam zawkte hi chuan kan hriat loh te pawh a rinawm avangin Zofate tana sul alo sut tawh dan tarlan kan han tum ang e.
Telela hi a hming tak chu Darchhingpuia niin Kum 1888-ah khan Khawrihnim khuaah alo piang a, vun rawng hang lam niin hmel fel rin ren tak a nih avang hian midangin ‘Telela’ tia an kohna chu a hming tak aiin alo pu ta zawk a. A pian hmain a pain a boralsan a, a pian hnu lawk hian a nuin a kir san leh bawk si avangin a Ni (a pa farnu) chuan fahrah takin a tulpui ta a ni. Kum 1900-ah sipai bel nawtin Aizawlah lehkha a zir a, 1904-ah Lower Primary a pass a, kum reilote chawlin kum 1910-ah Upper Primary a pass leh a ni. Kum 1912 (?)ah Hrangkungi nen inneiin fa 9 an nei a, a fanu naupang ber chu Pu Vanlalngaia nupui hi a niin Pu Telela chu July 7, 1966-ah ama In, Kulikawnah a boral a ni.
Kum 1915-ah chuan Reiek Lal Lalluaia nen boruak tha lo an nei a, heta tang hian Politics lam pawh a ngaihven tan nia hriat a ni. Boruak tha lo an neih chhan chu; Reiek Lal, Laluaia chuan a fapa Kailuia chu pawl li zir tur awmna turin Thakthingah bawk In sa turin favangah a khuate a rawn hruai teuh mai a. Reiek khua amite hi mi pahnih chu Telela hian hlawh neiin alo ruai ve mek bawk si avangin chutianga Reiek Lalin hlawh nei loa Thakthinga a fapa awmna tur In sak tir a tum chu duh loin harsatna a thleng ta a ni. Reiek Lal chuan Sapte H.C. Beaumouth hnenah lehkha sei taka ziakin a hek ta a, Sapte chuan Telela chu an ko a. Chumi hnuah chuan Bawrhsap Hezlett hnenah an appeal leh a, nimahsela Telela chuan thiam a chang ta zawk a. Telela chuan Lal pawh nisela dan dik tak hmangin mipui an enkaawl tur a ni tiin tanhmun a khawh tlat avangin Bawrhsap tan pawh chuan chu chu thil tha tak a nih bawk si avangin thiam hi a chang a ni.
Telela hian hetiang chauh niloin kan Mizo Lalte rorel dan chu Bawrhsap in Mizo mipuite chunga an duh dan dana ro an relna anga ngaiin a lungawi thei lo a. Lalte’n an chan ti vawng tura sorkar tuk bak Kuli an awl te, Duham taka pem buh an hawlh bung thin te, Ar leh Artui khawn zing lutukte chu a ngaihmawh zualte a ni. Kum 1922 alo thlen meuh chuan hetianga thlawhhma neite tana phurrit tam tak a awm hi tihbo a nih theihna atan theihtawp a chhuah a, Chhim tawp leh Hmar tawp, Chhak leh Thlang thlengin a inchhawka Ar leh Artui ngen a ni thin bawk chu a ngai mawh berte zing ami a ni. Officer sap-ho tan a man hi tlawm hlein lang mahsela a tuartu tan kal velna tha sen han chhut chuan chawi belhna hi a ni hliah hliah zawk si a. Hetih lai hian Ar puitling pali man hi Siki a ni a, Artui man hi Anna chanve (pawisa pahnih) atan chauha pek an ni thin. Hetianga mipui tana phurrit siam hi a ni chuan kimchang taka ziakin kum 1922 June thlaah chuan Rev. DE. Jones hnenah pein Bawrhsap hnena thlen sak turin a ti nghe nghe a ni. Hetiang thil a buaipui lai hian thurualpui tak tak pawh ala nei meuh lo a, amal beih a, amahin engkim mai chu a su hmiah hmiah mai a ni.
Kan sawi hmaih loh tur chu Telela hian kum 1917 April atanga kum 1918 July thla chhungah khan France ramah kalin kum khat chhung vel lai a zuk awm. Kum 1917 kumtirah chuan Kumpinu thupekin Bawrhsap chuan ‘Lushai Labour Corps’ a chhuak turin Mizo tlangval rual mi sang hnih lai chu Mizo Lalte hnenah a rawn phut a, hetiang hian an ram awp, China, South Africa, Australia, New Zealand, West Indies, Canada, Fiji, Malta, Mauritius leh India atangte chuan Labour Corps hi phut a ni. Chutiang chuan Telela ngei pawh Frence rama kalin dam takin a rawn hawng leh a, chumi a rawn haw leh hnuah ngei pawh chuan Zoram mipuite tana a thinlung put ngai bawk chu thlah thei chuang loin a bul tanna atan kum 1922-ah Bawrhsap hnena thlen turin lehkha sei tak a ziak ta a ni. Hetiang bawk hian kum 1926 January thlaa Bawrhsap NE. Perry thupeka Zawlbuk sak tur tih pawh chu tel duh loin a runna pawisa pawh an lo pe duh lo tawh bawk a, kum 1928 velah pawh chuan Bawrhsap thuneihna khirh tak chu G.P. Sharma, Jailor ruaiin Assam Sorkarah vuinaina thu an lo zuk thlen tawh bawk.
Hetianga Assam sorkar hnena lehkha an thehluh hnua rorelna an han hmachhawn meuh chuan a hlawhtling lo chiang hle a, anni hruaitu deuh chin mi parukte chu Cheng Za theuh chawi tirin midangte chu Cheng Sawmli an chawi tir bawkin a vaiin Cheng Sang hnih a tling khawm a ni. Bawrhsap leh Lalte chu an tanrual tlat tawh avangin hmun tinah ‘Kulikawn Misualho’ tih an lo ni ta zawk hial a. Nimahsela he thu hi Politics rahbi a rah tanna zawk alo nih avangin thil chhinchhiah tlak tak a ni. Telela hian thurualpui a neih zel avangin an thawm chu mitdelte hriat khawpin tih ang maiin an thawm chu hmun tinah hriat alo nih tak zelah phei chuan Aizawl Bawrhsap chuan Oct. 22, 1926 zing ni chhuah hmain Assam Rifle 2nd Commandant sipai 60 rual chuan Asst.
Superintendent ho chuan Telela, Thuama, VZ. Biaka, Saikunga, Chawnghnuaia, Chawngdailova leh Zuala te chu an lehkha pawimawh zawng zawng nen anmahni In theuhah an man ta a ni. Hetia man an niha Aizawl Thanaa thla thum chhung vel an tan chhung hian Kulikawn paho leh tlangvalte chuan thingpui an pe reng a, thingtlang khaw hnai deuh; Reiek, Ailawng, Tuahzawl, Tanhril, Chaltlang, Hlimen, Chhingchhip, Thentlang leh Lungpho atang tein Ar te, Sa rep te leh chawhmeh chi hrang hrang an pe thin bawk. Hetih lai hian an Lehkha pawimawh tak takte chu Suakkunga hoin Tui-umah thunin daipawnah an phum bo daih thung a ni.
Lal ho an hekna point pawimawh deuh deuhte chu;
Buh chhun tam lutuk, thap fai kher ngai bawk si.
In sak hautak lutuk, hlawh awm bawk si lo.
Mautam buh puk, Lalin a rulh ve lohna khuatea belh ral.
An duhamna pung tial tialte
Hetianga Lal leh Bawrhsap an heknate hi mipuite thlavang hauhna vang vek a ni a, mipui aiawh tak meuh meuha hetianga thil ti hi an ni. Tumkhat chu an Court-naah hetiang hian an inchhang a;
NE. Perry: Telel, mi phal lo chung Ar leh Artui ka la ngai em ni?
Telela: I la ngai ka ti lo, Lal hote’n chibai an buka che hi anmahni Ar a ni lo a, an khaw mite hnen atanga an lakkhawm thin a niin a man pawh an pe ngai lo.
NE. Perry: Ramhuai rilru i tih hi hrilhfiah rawh, eng nge ni?
Telela: Man loa Lal hote’n an khuate thil neih an lak fo chuan sual hnathawh a ni a, chung ang chu ramhuai rilru ka ti mai a ni.
Hetianga an inchhan hnu chuan Telela chuan ‘Hei ni tam tak min hreng ta a, ka thiante hi chhuah vek la, keiman ka tuar ang; tha zawk tur a nih chuan ka nghawngah zai rawh’ tiin NE. Perry chu ava pan phei a, a ni chuan ‘Telel, dan a ni lo reng reng’ a ti a, chutia an inchhan hnuah chuan Court atangin Thana lamah an hruai phei lehin chumi hnuah chuan Cheng 500/- chawi leh Cheng 300/- chawia intiamkamna nen December 1926-ah chuan chhuah an ni ta a ni.
Heng lo pawhin Pu Telela hian sulhnu tam tak a nei a, tun atan chuan heti chin hi duhtawk rih mai ila. Kum 1946-a Mizo Union lo piangah khan a hnarkaitu zingah tel zelin Mizo hnam tan tiin Shillong tlang te pawh a zuk thleng hial a. MU President atana Khawtinkhuma an thlanfel hnu lawka Thakthing Zawlbuk-a vangtlang inkhawmah hetiang hian thu a sawi a ‘Tun hma kum 1926-a Lal khua leh tui phurrit ka veia ka at phah lek lek thu, Mizorama la awm ngai lo, awm leh pawha rin theih loh leh kum 1934 hun laia ka tuar nasat dan te, zalenna tur chuan ka nunna pawh ui lo khawpa ka awm hnuah chhim leh hmar, chhak leh thlanga kan lehkhathiamte hruaia ram zalenna tura kan ding rual hi ka lawm tak meuh a ni. Tunah chuan thi mah ila, pawi ka ti tawh lo. Tun hmaa ka ngaihtuah ang rilru pu an la awm hma chuan thih hi ka inpeihin ka inhre rih lo a, kan tuar lai ka ngaihtuahin ka lung a chhe ngawt mai’ tiin hnuk ulh teuhin a sawi a ni.
Thu laknate;
Vanlalngaia, Memoirs of Telela (Zoram Politics Lungphum phumte chu). Published by MCL Publication, Khatla South, Aizawl: Mizoram. Chhut hnihna – 2017.
C. Vanlallawma, Tun kum za chhunga Mizo hnam puipate 1894 – 1994. Published by MC. Lalrinthanga. First Print; 1994.
C. Lalnunchanga, ZORAM MI HRANGTE AN VANGLAI. Published by C. Lalrinmawia. First Edition: 2013.