Zoram tidai thintu chu ruah

Zoram tidai thintu chu ruah
Khua a lum viau pawhin ruah tui a tlak hlek chuan khua a dai mai thin. A sur tam deuh phei chuan khua pawh a vawt mai a, nipui lai pawhin inthuam lum a ngaih chang a awm.
Tun thlaah pawh khua a lum huam huam a, mahse ruah a tlak chuan khaw lum a zia mai.
State Meteorological Centre-in an chhinchhiah danin, kar hmasa Ningani, April ni 20-ah khan Aizawl hi a lum ber laiin 31 degree Celsius a ni a ni, a vawh ber laiin 20 degree Celsius a ni. Ni 21-ah ruah a sur a, a lum ber lai 27 degree Celsius-ah, a vawh ber lai 17 degree Celsius-ah a tla nghal. Zirtawpni-ah khua a dai deuh huai a, zan lamah phei chuan intihlum deuh te pawh a ngai.
A tuk Inrinni-ah ruah tui mm 3.2 a tla a, hemi ni hian a lum ber laiin 29 degree Celsius a ni. A tuk Chawlhni, April ni 23-ah ruah tam tham tak, mm 27.5 a sur a, khua pawh a dai lehzual; khami ni khan a lum ber laii 27 degree Celsius a ni a, a vawh ber lai pawhin 15 degree Celsius a ni.
Lum leh vawt tehnaah hian a lum ber lai tlukin a vawh ber lai hi a pawimawh a, April ni 23-a a vawh ber lai, 15 degree Celsius hi nipui lai chuan hniam tak a ni. Chawlhni tlai lam leh zanah khan khua kha a vawt deuh surh reng a nih kha.
Tun hnaiah ruah a tla zeuh na a, tih tham a sur lo. Zirtawpni khan ruah a sur lo a, a lum ber laiin 29 degree Celsius, a vawh ber laiin 20 degree Celsius a ni.